ក្រុមអ្នកស្រាវជ្រាវ និយាយថា ពួកគេបានរកឃើញហ្សែនក្នុងដើមស្រូវដែលអាចសំខាន់ ក្នុងការបង្កើនទិន្នផលស្រូវ ខណៈកាត់បន្ថយតម្រូវការប្រើប្រាស់ជីគីមីដែលធ្វើឲ្យប៉ះពាល់ដល់បរិស្ថាន ។

លោកវេជ្ជបណ្ឌិត Zhe Ji គឺជាអ្នកស្រាវជ្រាវនៅសាកលវិទ្យាល័យ Oxford និយាយថា ដូច្នេះហើយ ជីគីមីវាផ្ទាល់ មិនមែនជារឿងអាក្រក់នោះទេ ។ ពួកយើងពិតជាត្រូវការជីគីមី ហើយជីអាសូត គឺជាអ្វីមួយដែលកំពុងចិញ្ចឹមពួកយើងសព្វថ្ងៃនេះ ប៉ុន្តែបញ្ហាត្រង់ថា ជីអាសូត ពិតជាប្រើប្រាស់លើសចំនួន និងប្រើប្រាស់ហួសហេតុ ពីព្រោះថា ការផលិតជីអាសូត គឺចំណាយប្រាក់ច្រើន ហើយការប្រើប្រាស់វាហួសប្រមាណ នឹងធ្វើឲ្យប៉ះពាល់ដល់បរិស្ថាន ។

លោក Ji គឺជាផ្នែកមួយនៃក្រុមស្រាវជ្រាវរបស់សាកលវិទ្យាល័យ Oxford សាកលវិទ្យាល័យកសិកម្ម Nanjing និងបណ្ឌិតសភាវិទ្យាសាស្រ្តចិន ហើយនិងសិក្សាពីគ្រាប់ធុញ្ញជាតិដែលជាស្បៀងអាហារសម្រាប់មនុស្សជាងពាក់កណ្តាលនៅលើសកលលោក ស្របពេលដែលបម្រែបម្រួលសអាកាសធាតុ គំរាមកំហែងដល់ការផលិតរបស់ពួកគេ ។

ដើមស្រូវ ដូចជារុក្ខជាតិទាំងអស់ដែរ ត្រូវការអាសូត ។ ពេលដែលវាស្ថិតក្នុងបរិស្ថានអាសូតទាប តាមធម្មតាដើមរបស់វាចាក់ឫសចូលជ្រៅទៅក្នុងដី ហើយផលិតទង និងគ្រាប់តិច ។

លោក Jiនិយាយថា ការសម្របសម្រួលរវាងឫស និងពន្លកនេះ គឺជាលក្ខណៈស្តង់ដារនៃការសម្របខ្លួន ប៉ុន្តែវានឹងនាំឲ្យអ្នកផលិតស្រូវប្រើប្រាស់បរិមាណជីអាសូតច្រើន ដើម្បីរក្សាទិន្នផលខ្ពស់ ។

លោកបន្តថា ដូច្នេះហើយ ពួកយើងចង់កំណត់អត្តសញ្ញាណពូជស្រូវដែលមានការផ្លាស់ប្តូរហ្សែន គឺពូជស្រូវរបស់ពួកយើង បង្ហាញពីសមាមាត្រជីវម៉ាសរវាងឫស និងពន្លក ដែលមានស្ថិរភាព នៅពេលដែលកម្រិតអាសូតខាងក្រៅផ្លាស់ប្តូរ ។ ដូច្នេះហើយពួកយើងពិតជារំភើបចិត្តណាស់ចំពោះការផ្លាស់ប្តូរហ្សែននេះ ហើយពួកយើងបានសម្រេចចិត្តសិក្សាវាបន្ថែមទៀត ដោយផ្តោតសំខាន់លើវា ៕