លោកប្រធានាធិបតី Donald Trump កាលពីថ្ងៃសុក្រ បាន​សម្តែង​ការ​ខក​ចិត្ត​ចំពោះ​ជំហរ​របស់​ប្រទេស​អ៊ីរ៉ង់​ ក្នុងការចរចានុយក្លេអ៊ែរ ខណៈបុគ្គលិកសហរដ្ឋអាមេរិកបានចាកចេញពីអ៊ីស្រាអែល ដោយ​សារតែការព្រួយបារម្ភអំពីសុវត្ថិភាព ប៉ុន្តែអ្នកសម្របសម្រួលប្រទេសអូម៉ង់ បានជំរុញ​នូវ​អ្វី​ដែល​ខ្លួន​និយាយ​ថា​ជា «ការទម្លាយភាពទាល់ច្រក» ដើម្បីបញ្ចៀសសង្គ្រាម។

លោក Trump បានបញ្ជាឱ្យបង្កើនយោធា​ច្រើន​បំផុត​ក្នុង​រយៈ​ពេល​ជា​ច្រើនទ​សវត្សរ៍​មក​នេះ​នៅ​តំបន់​មជ្ឈិម​បូព៌ា ដោយមានទាំងនាវាផ្ទុកយន្តហោះធំបំផុតរបស់ពិភពលោក USS Gerald R Ford ដែលកំពុងនៅជិតឆ្នេរសមុទ្រអ៊ីស្រាអែល ខណៈលោក​ទាមទារ​ឱ្យ​អ៊ីរ៉ង់​ព្រម​ព្រៀង​ធ្វើ​សម្បទា​ន​ដ៏​ទូលំទូលាយជុំវិញការព្រួយបារម្ភដែលចាប់ផ្តើមពីកម្មវិធីនុយក្លេអ៊ែររបស់ប្រទេសនេះ។ មួយ​ថ្ងៃប​ន្ទាប់ពីសហរដ្ឋអាមេរិក និងអ៊ីរ៉ង់ បានជួបចរចានៅទីក្រុងហ្សឺណែវ ប្រទេសស្វីស លោក Trump បាននិយាយថា រដ្ឋដែលដឹកនាំដោយមេដឹកនាំសាសនាមួយនេះ «ពុំមាន​ឆន្ទៈ​ផ្ត​ល់​ឱ្យ​យើង​នូវ​អ្វីដែលយើងត្រូវមាន» នោះទេ។ លោក Trump បានប្រាប់អ្នកសារព័ត៌មានថា «យើង​មិន​សប្បាយ​ចិត្តនឹងរបៀបដែលពួកគេបានចរចានោះ។ ពួកគេ មិនអាចមានអាវុធនុយក្លេអ៊ែរទេ ហើយ​យើង​មិនសប្បាយចិត្តនឹងរបៀបដែលពួកគេកំពុងចរចាឡើយ»។ ក្រោយមក​លោក​បាន​និយាយ​ថា លោកចង់ឱ្យអ៊ីរ៉ង់ «គ្មានការចម្រាញ់» អ៊ុយរ៉ានីញ៉ូមទាំងស្រុង ដែលអាចឈាន​ទៅ​រក​ការ​ផលិត​គ្រាប់បែកនុយក្លេអ៊ែរ ខណៈអ៊ីរ៉ង់ច្រានចោលថាខ្លួនមិនកំពុងបន្តនោះទេ។ ប៉ុន្តែ​ប្រទេស​អូម៉ង់ ​ដែលបានសម្របសម្រួលកិច្ចចរចានៅទីក្រុងហ្សឺណែវ បានផ្តល់នូវរូបភាពដ៏ល្អប្រសើរច្រើន និង​បាននិយាយថា អ៊ីរ៉ង់បានព្រមព្រៀងមិនស្តុកទុកសារធាតុអ៊ុយរ៉ានីញ៉ូមណាមួយឡើយ។

រដ្ឋមន្ត្រីការបរទេសអូម៉ង់ លោក Badr Albusaidi ដែលបានស្ថិតនៅទីក្រុងវ៉ាស៊ីនតោន បាន​ជួប​ជាមួ​យ​អនុប្រធានាធិបតីសហរដ្ឋអាមេរិក លោក JD Vance បាននិយាយថា អ៊ីរ៉ង់ក៏បាន​ព្រម​ព្រៀង​បន្ថយ​ស្តុកបច្ចុប្បន្នទៅជាឥន្ធនៈ៕