បព្វជិតជាន់ខ្ពស់អ៊ីរ៉ង់ម្នាក់ បាននិយាយកាលពីថ្ងៃសុក្រថា អ៊ីរ៉ង់មិនដែលយល់ព្រមផ្អាកការចម្រាញ់សារធាតុអ៊ុយរ៉ានីញ៉ូមទេ ហើយនឹងមិនធ្វើដូច្នេះទេ។ នេះបើយោងតាមទីភ្នាក់ងារសារព័ត៌មាន Fars ពាក់កណ្តាលផ្លូវការ។

លោក Seyed Ahmad Khatami ដែលជាមេដឹកនាំអធិស្ឋានបណ្តោះអាសន្នរបស់ទីក្រុងតេអេរ៉ង់ បានធ្វើការអត្ថាធិប្បាយនេះ ក្នុងអំឡុងពេលអធិស្ឋាននៅក្នុងរដ្ឋធានីនេះ។ លោកបានហៅការបញ្ឈប់ការចម្រាញ់សារធាតុអ៊ុយរ៉ានីញ៉ូមនេះថា ជា «បញ្ហាមិនអាចទៅរួច» ដែលបានលើកឡើងដោយអ្នកចរចាអាមេរិកមួយចំនួន» ហើយបាននិយាយថា អ៊ីរ៉ង់នឹងមិនទទួលយក «ភាពអាម៉ាស់» បែបនេះទេ។

លោក Khatami បានបន្ថែមថា អ្វីដែលលោកពិពណ៌នាថា ជាកិច្ចខិតខំប្រឹងប្រែងរបស់សហរដ្ឋអាមេរិក ក្នុងការកំណត់លក្ខខណ្ឌ នឹងបរាជ័យ។ លោកបាននិយាយថា ការចរចាដោយប្រយោលរវាងទីក្រុងតេអេរ៉ង់ និងទីក្រុងវ៉ាស៊ីនតោន ត្រូវបានកំណត់ចំពោះបញ្ហានុយក្លេអ៊ែរ ហើយកម្មវិធីមីស៊ីលរបស់អ៊ីរ៉ង់ និងសមត្ថភាពការពារជាតិផ្សេងទៀត មិនបើកចំហសម្រាប់ការចរចាទេ។

ការអត្ថាធិប្បាយទាំងនេះ បានកើតឡើង បន្ទាប់ពីកិច្ចចរចាជុំទី៣ រវាងសហរដ្ឋអាមេរិក និងអ៊ីរ៉ង់ នៅទីក្រុងហ្សឺណែវ កាលពីថ្ងៃព្រហស្បតិ៍ ដែលបានធ្វើឡើងចំពេលមានភាពតានតឹងកើនឡើង និងការបង្កើនវត្តមាន យោធារបស់សហរដ្ឋអាមេរិក នៅក្នុងតំបន់នេះ៕