ភ្នំពេញ៖ ការនាំចេញទំនិញរបស់ប្រទេសកម្ពុជា ទៅកាន់ទីផ្សារកូរ៉េខាងត្បូង បន្តមានកំណើនជាវិជ្ជមាន ដោយមានកំណើន ៣៣ភាគរយ ក្នុងរយៈពេលពីរខែដើមឆ្នាំ២០២២នេះ។

ប្រទេសទាំងពីរ រំពឹងថា កិច្ចព្រមព្រៀងពាណិជ្ជកម្មសេរីទ្វេភាគី នឹងជំរុញដល់កំណើនពាណិជ្ជកម្ម ជាពិសេសទាក់ទាញវិនិយោគបន្ថែមពីកូរ៉េខាងត្បូង និងប្រទេសដទៃទៀត ចូលមក​វិនិយោគ​នៅ​កម្ពុជា ដើម្បីផលិត​កែច្នៃ ​នាំចេញទៅកាន់ប្រទេសកូរ៉េខាងត្បូង នៅក្រោមបន្ទាត់ពន្ធអនុគ្រោះ។

សម្តេចតេជោ ហ៊ុន សែន ​នាយករដ្ឋមន្រ្តីកម្ពុជា ថ្លែងថា នៅថ្ងៃទី២៣ ​ខែមីនានេះថា ការនាំចេញ​សរុប​របស់​កម្ពុជា ​មានកំណើន ៣០ភាគរយ ​ក្នុងរយៈពេលខែមករា ​និងខែកុម្ភៈ ​ឆ្នាំ២០២២។ ដោយឡែកការនាំចេញទៅកាន់ទីផ្សារប្រទេសកូរ៉េខាងត្បូង​ មានកំណើន ​៣៣ភាគរយ។

ថ្លែងក្នុងពិធីសម្ភោធដាក់ឱ្យប្រើប្រាស់ជាផ្លូវការផ្លូវជាតិលេខ២១ ពីរង្វង់មូលក្រុងតាខ្មៅ ដល់​ស្ពាន​កោះធំ ​សម្តេចតេជោ​ លើកឡើងថា ​កំណើន​នៃការនាំចេញរបស់កម្ពុជា ទៅ​កាន់ទីផ្សារ​ប្រទេសកូរ៉េខាងត្បូង ​រំពឹងថា ​នឹងមានកំណើនទៀត ​ដោយសារ​ទំនាក់ទំនង​ល្អរវាងរដ្ឋាភិបាល​នៃ​ប្រទេសទាំងពីរ​ ជាពិសេសការចូលជាធរមាននៃកិច្ចព្រមព្រៀងពាណិជ្ជកម្មសេរីទ្វេភាគីរវាង​ កម្ពុជា-កូរ៉េខាងត្បូង។

នៅក្រោមកិច្ចព្រមព្រៀងសេរីពាណិជ្ជកម្មនេះ ​កម្ពុជានឹងអាចនាំចេញទំនិញសំខាន់របស់ខ្លួន មាន​ជាអាទិ៍ ផលិតផលកសិផល ផលិតផលបច្ចេកវិទ្យា ផលិតផលឧស្សាហកម្មខ្នាតតូចនិងមធ្យម និង​ផលិតផល​វាយនភណ្ឌ​ ក្នុង​បន្ទាត់​ពន្ធ​ប្រមាណ​ចំនួន ១ម៉ឺនដោយពុំជាប់របាំងពន្ធគយ។

អគ្គរដ្ឋទូតកូរ៉េខាងត្បូងប្រចាំនៅកម្ពុជា ​ឯកឧត្តម ឯកឧត្តម ផាកហ៊ឺង ឃ្យុង (Park Heung-Kyoeng) បានលើកឡើងថា ​ក្រៅពីកិច្ចព្រមព្រៀងពាណិជ្ជកម្មសេរីទ្វេភាគី កម្ពុជានិងកូរ៉េខាងត្បូង គ្រោង​ពង្រីកការបើកចំហទីផ្សារបន្ថែមនៅក្រោមកិច្ចព្រមព្រៀងពាណិជ្ជកម្មសេរីអាស៊ាន-កូរ៉េ និង​នៅក្រោមកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ​ដែលក្នុងនោះកូរ៉េ និង​កម្ពុជា​គឺជាដៃគូដ៏សំខាន់ផងដែរ​នៃកិច្ចព្រមព្រៀងនេះ ។

សូមបញ្ជាក់ថា ​ការដោះដូរពាណិជ្ជកម្មទ្វេភាគីរវាងកម្ពុជា ​កូរ៉េខាងត្បូង ​សម្រេច​បានទឹកប្រាក់ ៩៦៥​លាន​ដុល្លារ ក្នុងឆ្នាំ២០២១ កន្លងទៅ ​កើនឡើង ៩ភាគរយធៀបនឹងឆ្នាំ២០២០ នេះបើយោង​តាម​ទិន្នន័យ​ពាណិជ្ជកម្មពី​ សមាគម​ពាណិជកម្មអន្តរជាតិកូរ៉េ។

ក្នុងនោះ កម្ពុជា ​នាំចេញទំនិញទៅកាន់ទីផ្សារប្រទេសកូរ៉េខាងត្បូង ​មាន​តម្លៃសរុប ៣៤០​លានដុល្លារ ​កើនឡើង ៧,៥ភាគរយ៕ អត្ថបទ៖ វណ្ណៈ