យោធា និងនរគបាលអាហ្វហ្គានីស្ថាន បាននិយាយនៅថ្ងៃសៅរ៍ (ទី២៨ ខែកុម្ភៈ)នេះថា យន្តហោះចម្បាំងប៉ាគីស្ថានមួយគ្រឿង បានធ្លាក់ នៅក្នុងទីក្រុងក្រុង Jalalabad ហើយអ្នកបើកយន្តហោះនេះ ត្រូវបានចាប់ខ្លួននៅរស់ ដោយអ្នកស្រុកបានប្រាប់សារព័ត៌មាន AFP ថា អ្នកបើកនោះ បានលោតឆ័ត្រយោងពីលើយន្តហោះ មុនពេលត្រូវបានឃាត់ខ្លួន។ 

អ្នកនាំពាក្យនគរបាល លោក Tayeb Hammad បាននិយាយថា៖«យន្តហោះចម្បាំងប៉ាគីស្ថានមួយគ្រឿង ត្រូវបានបាញ់ទម្លាក់ នៅក្នុងសង្កាត់ទី ៦ នៃទីក្រុង Jalalabad ហើយអ្នកបើកយន្តហោះរបស់វា ត្រូវបានចាប់ខ្លួននៅរស់»។

លោក Wahidullah Mohammadi អ្នកនាំពាក្យយោធានៅភាគខាងកើតអាហ្វហ្គានីស្ថាន បានបញ្ជាក់ថាយន្តហោះប៉ាគីស្ថាន ត្រូវបានបាញ់ទម្លាក់ដោយកងកម្លាំងអាហ្វហ្គានីស្ថាន «ហើយអ្នកបើកយន្តហោះនេះ ត្រូវបានចាប់ខ្លួននៅរស់»។

អ្នកសារព័ត៌មាន AFP បានឮសំឡេងយន្តហោះមួយនៅលើអាកាស មុនពេលមានការផ្ទុះពីទិសដៅនៃអាកាសយានដ្ឋាននៅក្រុង Jalalabad ដែលជារដ្ឋធានីនៃខេត្ត Nangarhar គឺស្ថិតនៅលើផ្លូវរវាងទីក្រុង   កាប៊ុល និងព្រំដែនប៉ាគីស្ថាន៕