សារព័ត៌មាន New York Times៖ មុនពេលគ្រាប់បែករបស់អាមេរិក និងអ៊ីស្រាអែល ចាប់ផ្តើមស្រោចលើអ៊ីរ៉ង់ កាលពីថ្ងៃសៅរ៍ ទី២៨ ខែកុម្ភៈ ម្សិលមិញនេះ មេដឹកនាំកំពូលរបស់អ៊ីរ៉ង់ គឺលោក Ayatollah Ali Khamenei ដែលកាន់អំណាចអស់រយៈពេលជិត ៤០ ឆ្នាំ បានគ្រោងផ្ទេរអំណាចរួចទៅហើយ ក្នុងករណីដែលលោកទទួលមរណភាព។

កាលពីថ្ងៃសៅរ៍ លោកប្រធានាធិបតីអាមេរិក Donald Trump បានប្រកាសថា លោក Khamenei បានស្លាប់បាត់ទៅហើយនៅក្នុងការវាយប្រហារ ខណៈអ៊ីរ៉ង់ ក៏បានបញ្ជាក់ពីការស្លាប់នេះផងដែរ។ មន្ត្រីជាន់ខ្ពស់អ៊ីរ៉ង់មួយចំនួនបាននិយាយថា មានបេក្ខជនបីរូប ដែលលោក Khamenei បាននិយាយថា លោកពេញចិត្តនឹងឱ្យកាន់តួនាទីជាមេដឹកនាំកំពូលបន្តពីលោក។ 

អ្នកទាំងបីនោះរួមមាន ​ប្រធាន​ស្ថាប័ន​តុលាការ លោក Gholam-Hossein Mohseni-Eje’i ប្រធាន​បុគ្គលិក​របស់​លោក Khamenei គឺ​លោក Ali Asghar Hejazi និង​លោក Hassan Khomeini ​មក​ពី​ក្រុម​នយោបាយ​កំណែទម្រង់ ដែល​ជា​ចៅប្រុស​របស់បិតាស្ថាបនិកនៃបដិវត្តន៍អ៊ីស្លាម Khomeini។

យ៉ាងណាមិញ អ្វីដែលកំពុងកើតឡើងនៅអ៊ីរ៉ង់ពេលនេះ គឺមិនទាន់ច្បាស់លាស់នៅឡើយទេ ដោយសារមន្ត្រីជាន់ខ្ពស់ជាច្រើនរូបត្រូវបានសម្លាប់។ មុន​ការវាយប្រហារ​តាមអាកាស​នៅថ្ងៃសៅរ៍ លោក Khamenei បានចាត់វិធានការ​បង្ការ​ដើម្បីត្រៀមលក្ខណៈឱ្យរបបអ៊ីរ៉ង់​អាចបន្តរស់រានបាន ទោះបីជាលោកស្លាប់ក៏ដោយ។ លោក​បាន​ផ្ទេរ​ភារកិច្ច​ដឹកនាំ​ប្រទេស​ទៅឱ្យ​សម្ព័ន្ធមិត្ត​ជិតស្និទ្ធ​បំផុតមួយរូប​របស់​លោក គឺ​អ្នកនយោបាយ​ជើងចាស់ Ali Larijani ដែល​ជា​ប្រធាន​ក្រុមប្រឹក្សា​សន្តិសុខ​ជាតិ។

លោក Larijani បាននិយាយថា ក្រុមប្រឹក្សាថ្នាក់ដឹកនាំបណ្ដោះអាសន្នមួយនឹងត្រូវបានបង្កើតឡើងនៅថ្ងៃអាទិត្យ ទី១ ខែមីនា នេះ យោងតាមរបាយការណ៍ទូរទស្សន៍រដ្ឋអ៊ីរ៉ង់៕