តម្លៃប្រេងបានកើនឡើងជាង៨ ភាគរយដល់កម្រិតខ្ពស់បំផុតក្នុងរយៈពេលប៉ុន្មានខែមកនេះ នៅថ្ងៃចន្ទ ទី ២ ខែមីនា ខណៈអ៊ីរ៉ង់ និងអ៊ីស្រាអែល បានបង្កើនការវាយប្រហារនៅតំបន់មជ្ឈិមបូព៌ា ដោយបំផ្លាញនាវាដឹកប្រេង និងរំខានដល់ការដឹកជញ្ជូនពីតំបន់ផលិតប្រេងសំខាន់ៗ។

អ៊ីស្រាអែល បានបើកការវាយប្រហារថ្មីទៅលើទីក្រុងតេអេរ៉ង់កាលពីថ្ងៃអាទិត្យ ហើយអ៊ីរ៉ង់ បានឆ្លើយតបដោយការបាញ់ស្រោចមីស៊ីលកាន់តែច្រើន មួយថ្ងៃបន្ទាប់ពីការសម្លាប់មេដឹកនាំកំពូល លោក Ali Khamenei ដែលបានធ្វើឱ្យតំបន់មជ្ឈិមបូព៌ានិងសេដ្ឋកិច្ចពិភពលោក កាន់តែមានភាពមិនប្រាកដប្រជា។ យ៉ាងហោចណាស់មាននាវាដឹកប្រេងចំនួនបីគ្រឿង បានរងការខូចខាតនៅឆ្នេរសមុទ្រ ហើយនាវិកម្នាក់ត្រូវបានសម្លាប់ ខណៈការសងសឹករបស់អ៊ីរ៉ង់ចំពោះការវាយប្រហាររបស់សហរដ្ឋអាមេរិក និងអ៊ីស្រាអែល បានធ្វើឱ្យនាវាច្រើនគ្រឿងរងការខូចខាតជាបន្តបន្ទាប់ នេះបើយោងតាមប្រភពពីមន្ត្រីដឹកជញ្ជូន បាននិយាយកាលពីថ្ងៃអាទិត្យ។

ប្រភពពាណិជ្ជកម្មបាននិយាយថា ម្ចាស់នាវាដឹកប្រេង ក្រុមហ៊ុនប្រេងធំៗ និងក្រុមហ៊ុនពាណិជ្ជកម្ម ភាគច្រើនបានផ្អាកការដឹកជញ្ជូនប្រេងឆៅ ប្រេងឥន្ធនៈ និងឧស្ម័នធម្មជាតិរាវតាមច្រកសមុទ្រ Hormuz បន្ទាប់ពីទីក្រុងតេអេរ៉ង់បានព្រមាននាវាកុំឱ្យធ្វើដំណើរតាមផ្លូវទឹកនេះ។ ប្រេងសកលជាង២០ភាគរយ ត្រូវបានដឹកជញ្ជូនតាមច្រកសមុទ្រ Hormuz។

សន្ទស្សន៍តម្លៃប្រេងឆៅ Brent បានឡើងដល់កម្រិតខ្ពស់បំផុត ៨២,៣៧ ដុល្លារអាមេរិកក្នុងមួយបារ៉ែល ហើយមានតម្លៃ ៧៩,៣៤ ដុល្លារអាមេរិក កើនឡើង ៦,៤៧ ដុល្លារអាមេរិក ឬ ៨,៨៨ ភាគរយ គិតត្រឹមម៉ោង ៧:០៥ ព្រឹក ម៉ោងនៅប្រទេសសិង្ហបុរី។ តម្លៃប្រេងឆៅ West Texas Intermediate របស់សហរដ្ឋអាមេរិក បានកើនឡើង ៥,៣៦ ដុល្លារអាមេរិក ឬ ៨ ភាគរយ មានតម្លៃដល់៧២,៣៨ ដុល្លារអាមេរិកក្នុងមួយបារ៉ែល បន្ទាប់ពីបានឡើងដល់កម្រិតខ្ពស់បំផុត ៧៥,៣៣ ដុល្លារអាមេរិកពេលមុននេះ។