មន្ត្រីនៅរដ្ឋ Maharashtra ភាគខាងលិចប្រទេសឥណ្ឌា បាននិយាយកាលពីថ្ងៃអាទិត្យ ទី ១ ខែមីនា ថា ការផ្ទុះនៅរោងចក្រផលិតគ្រឿងផ្ទុះមួយកន្លែងបានបណ្តាលឲ្យមនុស្សយ៉ាងហោចណាស់ ១៧ នាក់ស្លាប់ និងរបួសមនុស្ស១៨នាក់ផ្សេងទៀត កាលពីថ្ងៃអាទិត្យ។ នាយករដ្ឋមន្ត្រី លោក Narendra Modi បាននិយាយថា ឧបទ្ទវហេតុនេះ «គួរឱ្យព្រួយបារម្ភយ៉ាងខ្លាំង» ។

លោក Devendra Fadnavis អភិបាលរដ្ឋ Maharashtra បានចាត់ទុកឧបទ្ទវហេតុនេះថា «ជារឿងសោកស្តាយ និងជាសោកនាដកម្មយ៉ាងខ្លាំង» នៅក្នុងការបង្ហោះលើបណ្តាញ X។

លោក Fadnavis បាននិយាយថា «ប្រតិបត្តិការជួយសង្គ្រោះត្រូវបានពន្លឿន ហើយរហូតមកដល់ពេលនេះ មនុស្ស ១៧ នាក់បានបាត់បង់ជីវិត» ដោយលោកបាននិយាយបន្ថែមថា មនុស្ស ១៨ នាក់ផ្សេងទៀតបានរងរបួស។ ការស៊ើបអង្កេតមួយត្រូវបានបញ្ជាឱ្យធ្វើឡើងចំពោះគ្រោះថ្នាក់នេះ។

កាលពីថ្ងៃសៅរ៍ មនុស្ស ២១ នាក់បានស្លាប់នៅក្នុងការផ្ទុះនៅរោងចក្រផលិតផាវមួយកន្លែងនៅរដ្ឋ Andhra Pradesh ភាគអាគ្នេយ៍ប្រទេសឥណ្ឌា។

គ្រោះថ្នាក់ផ្នែកឧស្សាហកម្ម គឺជារឿងធម្មតានៅក្នុងប្រទេសឥណ្ឌា ដែលជារឿយៗដោយសារតែការមិនគោរពចំពោះតម្រូវការសុវត្ថិភាព និងការអនុវត្តច្បាប់ធូររលុង។

កាលពីឆ្នាំមុន ការផ្ទុះរោងចក្រផលិតកាំជ្រួចមួយកន្លែងនៅភាគខាងលិចប្រទេសឥណ្ឌា ក៏បានបណ្តាលឲ្យមនុស្ស ២១ នាក់ស្លាប់។