ការអបអរសាទរ និងការកាន់មរណទុក្ខបានផ្ទុះឡើងនៅទូទាំងប្រទេសអ៊ីរ៉ង់ កាលពីថ្ងៃអាទិត្យ (១ មីនា) បន្ទាប់ពីការស្លាប់របស់មេដឹកនាំកំពូលអ៊ីរ៉ង់ គឺលោក Ayatollah Ali Khamenei ដែលជាប្ររតិកម្មតបជាសាធារណៈដ៏បែកបាក់បំផុតមួយ ចំពោះទីបញ្ចប់នៃការគ្រប់គ្រងបែបសាសនារបស់បព្វជិតកំពូលរូបនេះអស់រយៈពេលជិត ៤ទសវត្សរ៍។

នៅទីលានចតុរង្គនៃទីក្រុងតេអេរ៉ង់ ហ្វូងមនុស្សបានប្រមូលផ្តុំគ្នាដើម្បីកាន់ទុក្ខមេដឹកនាំ ដោយស្រែកយំយែក និងកាន់បដាដែលមានរូបភាពរបស់លោក Khamenei។ ប៉ុន្តែវីដេអូនានាដែលត្រូវបានចែករំលែកយ៉ាងទូលំទូលាយនៅលើបណ្តាញសង្គម បានបង្ហាញពីភាពសប្បាយរីករាយនៃហ្វូងមនុស្សដែលកំពុងអបអរសាទរ ស្រែកហ៊ោ ច្រៀងរាំ ចុចស៊ីផ្លេរថយន្ត និងដុតកាំជ្រួចភ្ញីនៅតាមដងផ្លូវ នៅពេលដែលដំណឹងនៃការស្លាប់របស់មេដឹកនាំបានកើតមានឡើង។

ប្រតិកម្មតបផ្ទុយគ្នាយ៉ាងខ្លាំងទាំងនេះ បានឆ្លុះបញ្ចាំងពីភាពបែកបាក់យ៉ាងជ្រៅនៅក្នុងប្រទេសមួយ ដែលមានការភ្ញាក់ផ្អើលយ៉ាងខ្លាំងចំពោះការស្លាប់ភ្លាមៗរបស់មេដឹកនាំដែលគ្រប់គ្រងអស់រយៈពេល ៣៦ឆ្នាំ។ សម្រាប់អ្នកដែលបានជួបប្រទះអំពើហិង្សានៃការបង្ក្រាបថ្មីៗនេះរបស់របបអ៊ីរ៉ង់ លើការតវ៉ាទូទាំងប្រទេស ដំណឹងនេះពិតជាគួរឱ្យអបអរខ្លាំងណាស់។

អង្គការសិទ្ធិមនុស្ស HRANA ដែលមានមូលដ្ឋាននៅសហរដ្ឋអាមេរិក បាននិយាយថា មនុស្សជាង ៧.០០០នាក់ ត្រូវបញ្ជាក់ថាបានស្លាប់នៅក្នុងបាតុកម្មដ៏ហិង្សាកាលពីខែមករានោះ ដោយមានអ្នកស្លាប់ចំនួន ១១.០០០នាក់ទៀតកំពុងស្ថិតក្រោមការស៊ើបអង្កេត៕