អ៊ីរ៉ង់បានបើកការវាយប្រហារសងសឹកដោយមីស៊ីល និងយានដ្រូនកាលពីចុងសប្តាហ៍ប្រឆាំងប្រទេស៨នៅទូទាំងមជ្ឈិមបូព៌ា ដោយបានសម្លាប់មនុស្សរាប់សិបនាក់ និងរាប់រយនាក់របួស ខណៈសន្ធឹកគ្រាប់ផ្លោងនិងការផ្ទុះនៅថ្ងៃទីពីរបានធ្វើឲ្យកក្រើកពេញតំបន់នេះ ក្រោយប្រតិបត្តិការយោធារួមគ្នារវាងអាមេរិក និងអ៊ីស្រាអែល ដើម្បីកាច់បំបាក់អ៊ីរ៉ង់។

រហូតមកដល់ពេលនេះ ការវាយប្រហាររបស់អ៊ីរ៉ង់បានចំលើប្រទេសបារ៉ែន អ៊ីរ៉ាក់ ហ្ស៊កដានី គុយវ៉ែត អូម៉ង់ កាតា អារ៉ាប៊ីសាអ៉ូឌីត និងអារ៉ាប់រួម។

នៅអ៊ីស្រាអែល ជនជាតិអ៊ីស្រាអែល៩នាក់បានស្លាប់ក្នុងការវាយប្រហារដោយមីស៊ីលអ៊ីរ៉ង់ ដែលវាយប្រហារចំអគារមួយនៅទីក្រុងBeit Shemesh ភាគខាងលិចស្រុក Jerusalem កាលពីថ្ងៃអាទិត្យ។  

ការវាយប្រហារទាំងនោះបានបង្កផលប៉ះពាល់យ៉ាងខ្លាំងនៅទូទាំងឈូងសមុទ្រ។ អារ៉ាប់រួមបានរាយការណ៍ថា មនុស្សបីនាក់មកពីប្រទេសប៉ាគីស្ថាន នេប៉ាល់ និងបង់ក្លាដែស បានស្លាប់ ខណៈមនុស្ស ៥៨ នាក់មកពីសញ្ជាតិផ្សេងៗគ្នាបានរងរបួសក្នុងការវាយប្រហារដោយមីស៊ីល និងយានដ្រូនរបស់អ៊ីរ៉ង់ បន្ទាប់ពីការវាយប្រហាររបស់អាមេរិក និងអ៊ីស្រាអែលលើអ៊ីរ៉ង់។

ក្រសួងសុខាភិបាលគុយវ៉ែតក៏បាននិយាយផងដែរថា មនុស្សម្នាក់បានស្លាប់ និង៣២នាក់ផ្សេងទៀតបានរងរបួស អំឡុងភាពច្របូកច្របល់ក្នុងតំបន់នាពេលបច្ចុប្បន្ន។

នៅកាតា អ្នករងរបួសកើនឡើងដល់ ១៦ នាក់ បន្ទាប់ពីការវាយប្រហារសងសឹកដោយអ៊ីរ៉ង់ ។អ៊ីរ៉ាក់រាយការណ៍ថា មានអ្នកស្លាប់ពីរនាក់ និងរបួសបីនាក់ ក្នុងការវាយប្រហារមួយនៅតំបន់ Jurf al-Nasr នៃខេត្ត Babil។

នៅបារ៉ែន យានដ្រូនអ៊ីរ៉ង់មួយគ្រឿងបានវាយប្រហារអាកាសយានដ្ឋានអន្តរជាតិបារ៉ែន បណ្តាលឱ្យខូចខាតសម្ភារៈ ប៉ុន្តែពុំមានអ្នកស្លាប់ និងរបួសទេ នេះបើយោងតាមក្រសួងមហាផ្ទៃបារ៉ែន។

នៅអូម៉ង់ មនុស្ស៥នាក់បានរងរបួសក្នុងឧបទ្ទវហេតុពីរដាច់ដោយឡែកពីគ្នា ក្នុងនោះ៤នាក់នៅលើនាវាដឹកប្រេងដែលមានទង់ជាតិប្រទេសកោះ ប៉ាឡូ (Palau) នៅភាគខាងជើងនៃកំពង់ផែ Khasab និងកម្មករបរទេសម្នាក់បានរងរបួសក្នុងការវាយប្រហារដោយយានដ្រូន លើកំពង់ផែ Duqm។

ពុំមានអ្នកស្លាប់ និងរបួសត្រូវបានរាយការណ៍នៅក្នុងប្រទេសហ្ស៊កដានី ឬអារ៉ាប៊ីសាអ៊ូឌីតទេ៕