នៅជាន់ក្រោមដីក្នុងទីក្រុង Ramat Gan ភាគកណ្តាលប្រទេសអ៊ីស្រាអែល គ្រូពេទ្យបានតម្រៀបគ្រែ និងពិនិត្យឧបករណ៍តាមដាននៅក្នុងយានដ្ឋានចំណតរថយន្តក្រោមដីនៃមន្ទីរពេទ្យធំបំផុតមួយរបស់អ៊ីស្រាអែល ខណៈការបាញ់ស្រោចមីស៊ីលរបស់អ៊ីរ៉ង់ បានហោះពីលើក្បាលរយៈពេលពីរថ្ងៃជាប់ៗគ្នាមកនេះ។

នៅមជ្ឈមណ្ឌលវេជ្ជសាស្ត្រ Sheba ចំណតរថយន្តធម្មតាមួយកន្លែងត្រូវបានផ្លាស់ប្តូរទៅជាបរិវេណមន្ទីរពេទ្យដែលមានសំណង់រឹងមាំ មានបន្ទប់សម្ភព ផ្នែកសង្គ្រោះបន្ទាន់ និងផ្នែកឯកទេស។

បុគ្គលិកពេទ្យត្រូវបានគេមើលឃើញកំពុងផ្លាស់ទីឧបករណ៍ឆ្លងកាត់ច្រករបៀងបេតុង រៀបចំបន្ទប់សម្រាលកូន និងតាមដានអ្នកជំងឺនៅអគារក្រោមដី។

ការវាយប្រហារដែលសហរដ្ឋអាមេរិក និងអ៊ីស្រាអែល បានចាប់ផ្តើមជាផ្នែកមួយនៃការវាយប្រហារទ្រង់ទ្រាយធំ កាលពីថ្ងៃសៅរ៍ ទី២៨ ខែកុម្ភៈ ដោយបានសម្លាប់មេដឹកនាំកំពូលអ៊ីរ៉ង់ លោក Ayatollah Ali Khamenei ធ្វើឱ្យតំបន់ធ្លាក់ចូលទៅក្នុងជម្លោះ ដែលយោងទៅតាមលោកប្រធានាធិបតី Trump មានគោលបំណងផ្តល់ឱកាសឱ្យប្រជាជនអ៊ីរ៉ង់ផ្តួលរំលំរបបនេះ។

ខណៈមីស៊ីលសងសឹកត្រូវបានបាញ់ចេញពីអ៊ីរ៉ង់ឆ្ពោះទៅអ៊ីស្រាអែល មន្ទីរពេទ្យជាច្រើនកន្លែងមានចំណាត់ការធានាសុវត្ថិភាពរបស់ពួកគេ និងធានាសុវត្ថិភាពរបស់អ្នកជំងឺ ដោយមន្ទីរពេទ្យបានផ្លាស់ប្តូរអ្នកជំងឺទៅកាន់បន្ទប់នៅក្រោមដី។ នៅមជ្ឈមណ្ឌលវេជ្ជសាស្ត្រ Sheba ជាមន្ទីរពេទ្យធំបំផុតមួយរបស់អ៊ីស្រាអែល បុគ្គលិកបាននិយាយថា ពួកគេបានឈានមួយជំហាន ហើយសម្រេចចិត្តផ្លាស់ប្តូរបន្ទប់ទាំងអស់របស់ពួកគេ រួមមានគ្រែចំនួន២.០០០គ្រែ ទៅកាន់ចំណតរថយន្តក្រោមដីដែលមានទីតាំងនៅខាងក្រោមមន្ទីរពេទ្យ។