ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃអាទិត្យ (១ មីនា) ថា ការផ្លាស់ប្តូរនៅក្នុងប្រទេសអ៊ីរ៉ង់ ដែលបង្កឡើងដោយការវាយប្រហាររបស់សហរដ្ឋអាមេរិក និងអ៊ីស្រាអែល គួរតែត្រូវបាន «ប្រើប្រាស់ឱ្យបានត្រឹមត្រូវ» ដើម្បីផ្តល់ផលប្រយោជន៍ដល់ប្រជាជនអ៊ីរ៉ង់ ដែលបានស៊ូទ្រាំនឹងអំពើហិង្សាយ៉ាងធ្ងន់ធ្ងរពីអាជ្ញាធររបស់ខ្លួន ខណៈលោកក៏ឆ្លៀតព្រមានរុស្ស៊ីថា គួរតែមើលលទ្ធផលរបស់មេដឹកនាំអ៊ីរ៉ង់ផង ប៉ុន្តែមិនបកស្រាយច្បាស់ៗនោះទេ។

នៅក្នុងសុន្ទរកថាវីដេអូពេលយប់របស់ខ្លួន លោក Zelenskyy បាននិយាយថា អាជ្ញាធរអ៊ីរ៉ង់ បានសម្លាប់មនុស្ស «រាប់ម៉ឺននាក់ក្នុងរយៈពេលពីរបីខែចុងក្រោយនេះ» ដោយសំដៅទៅលើការបង្ក្រាបបាតុកម្ម។ លោកបន្តថា អ៊ីរ៉ង់ «បានកំណត់ទុកជាមុនលើការប្រព្រឹត្តរបស់ខ្លួន» ដោយការផ្គត់ផ្គង់យានដ្រូនយ៉ាងច្រើនដល់រុស្ស៊ី ក្នុងជម្លោះរយៈពេល ៤ឆ្នាំរបស់ទីក្រុងមូស្គូនៅអ៊ុយក្រែន ហើយក៏បាន «ញុះញង់ឱ្យមានសង្គ្រាមនៅក្នុងតំបន់ផងដែរ»។

លោក Zelenskyy បានសង្កត់ធ្ងន់ថា រុស្ស៊ី គួរតែយកចិត្តទុកដាក់លើអ្វីដែលបានកើតឡើងចំពោះមេដឹកនាំអ៊ីរ៉ង់ ហើយត្រូវតែចាំទុកថា «នៅទីបំផុត យុត្តិធម៌តែងតែកើតមានជានិច្ច»។

កាលពីថ្ងៃសៅរ៍កន្លងទៅ មេដឹកនាំអ៊ុយក្រែនរូបនេះ បាននិយាយថា ទីក្រុងមូស្គូបានបាញ់យានដ្រូនប្រភេទ Shahed ជាង ៥៧.០០០ គ្រឿង ដែលរចនាដោយអ៊ីរ៉ង់ ដាក់លើប្រទេសអ៊ុយក្រែន ក្នុងអំឡុងសង្គ្រាមជាច្រើនឆ្នាំមកនេះ៕