ភាគហ៊ុននៅក្នុងទីផ្សារអាស៊ីដែលកំពុងងើបឡើងបានធ្លាក់ចុះក្នុងការជួញដូរដំបូងនៅថ្ងៃចន្ទ២មីនាដើមសប្ដាហ៍នេះ ខណៈការវាយប្រហារយោធាដោយសហរដ្ឋអាមេរិក និងអ៊ីស្រាអែលលើអ៊ីរ៉ង់បានធ្វើឱ្យវិនិយោគិនស្វែងរកសុវត្ថិភាពដែលទាក់ទងនឹងប្រាក់ដុល្លារ មាស និងមូលបត្របំណុល។

ការលើកឡើងរបស់ប្រធានាធិបតីអាមេរិក Donald Trump ថាជម្លោះអាចបន្តរយៈពេលបួនសប្តាហ៍ខាងមុខ បានបន្ថែមភាពមិនច្បាស់លាស់ ដោយធ្វើឱ្យកាន់តែមានការភ័យខ្លាចថាអំពើហិង្សាអាចរីករាលដាលដល់ផ្នែកផ្សេងទៀតនៃមជ្ឈិមបូព៌ា។

ភាគហ៊ុនជប៉ុន និងប្រាក់យ៉េនបានធ្លាក់ចុះនៅថ្ងៃចន្ទ ២មីនានេះ ខណៈមូលបត្របំណុលរដ្ឋាភិបាលបានកើនឡើង។ សន្ទស្សន៍ភាគហ៊ុន Nikkei បានបើកនៅក្នុងតម្លៃ៥៧.៩៧៦.២០ ធ្លាក់ចុះ ៨៧៤,០៧ពិន្ទុ។

សន្ទស្សន៍ភាគហ៊ុនរបស់ប្រទេសចិនមានការប្រែប្រួលតិចតួចនៅថ្ងៃចន្ទនេះ បន្ទាប់ពីជម្លោះអ៊ីរ៉ង់   ខណៈភាគហ៊ុនថាមពល ការពារជាតិ និងមាស កើនឡើង ហើយភាគហ៊ុនក្រុមហ៊ុនអាកាសចរណ៍ និងទេសចរណ៍ បានធ្លាក់ចុះ។ សន្ទស្សន៍ភាគហ៊ុន Shanghai Composite (SSE) បានបើកនៅកម្រិត ៤.១៥១,៨០ ពិន្ទុ ធ្លាក់ចុះ១១,០៨ពិន្ទុ ឬ ០,២៧%។

នៅហុងកុង សន្ទស្សន៍ភាគហ៊ុន Hang Seng ដែលងាយនឹងប្រែប្រួលខ្លាំងជាងទីផ្សារសកល បានធ្លាក់ចុះជាង២% បន្ទាប់ពីបើកនៅកម្រិត២៦.៣០៥,៥៨ ពិន្ទុ ធ្លាក់ចុះ៣២៤,៩៦ ពិន្ទុ ឬ១,២២%។

នៅតំបន់ផ្សេងទៀត តម្លៃផ្សារភាគហ៊ុននៅកោះតៃវ៉ាន់បានធ្លាក់ចុះដល់ទៅ ២,៣%។ សន្ទស្សន៍ភាគហ៊ុនចម្បងរបស់ផ្សារហ៊ុនតៃវ៉ាន់ Taiwan Stock Exchange បានបើកដួញដូរក្នុងការធ្លាក់ចុះ ១៣៧,០១ពិន្ទុ នៅត្រឹម៣៥.២៧៧,៤៨ នៅថ្ងៃចន្ទនេះ៕