អ៊ីស្រាអែល បានបើកការវាយប្រហារតាមអាកាសយ៉ាងសន្ធាប់ជាថ្មី ដោយផ្តោតលើទីក្រុងតេអេរ៉ង់ ហើយក៏បានពង្រីកយុទ្ធនាការយោធារបស់ខ្លួនដាក់លើពួកសកម្មប្រយុទ្ធហេសបូឡា ដែលគាំទ្រដោយអ៊ីរ៉ង់ នៅក្នុងប្រទេសលីបង់ផងដែរ នៅថ្ងៃចន្ទ (២ មីនា) នេះ ដែលធ្វើឱ្យជម្លោះជាមួយអ៊ីរ៉ង់ កាន់តែរាលដាលពាសពេញមជ្ឈិមបូព៌ា ខណៈទីក្រុងវ៉ាស៊ីនតោនឱ្យសញ្ញាថា ការវាយប្រហារយោធារវាងសហរដ្ឋអាមេរិក និងអ៊ីស្រាអែល ទៅលើគោលដៅអ៊ីរ៉ង់ អាចបន្តរយៈពេលជាច្រើនសប្តាហ៍។

អ៊ីស្រាអែលបាននិយាយថា ខ្លួនកំពុងវាយប្រហារទីតាំងនៅប្រទេសលីបង់ ដែលមានទំនាក់ទំនងជាមួយក្រុមប្រដាប់អាវុធមូស្លីមស៊ីអ៊ីត ហេសបូឡា ដែលជាសម្ព័ន្ធមិត្តសំខាន់មួយរបស់ទីក្រុងតេអេរ៉ង់នៅមជ្ឈិមបូព៌ា បន្ទាប់ពីក្រុមប្រដាប់អាវុធនេះ ទទួលស្គាល់ថាខ្លួនបានបាញ់មីស៊ីល និងយានដ្រូនឆ្ពោះទៅកាន់អ៊ីស្រាអែល ដើម្បីសងសឹកចំពោះការសម្លាប់មេដឹកនាំកំពូលអ៊ីរ៉ង់ Ali Khamenei។

យោធាអ៊ីស្រាអែលបាននិយាយថា ខ្លួនបានស្ទាក់ចាប់គ្រាប់ផ្លោងមួយគ្រាប់ដែលបាញ់ចេញពីលីបង់ ខណៈគ្រាប់ផ្លោងផ្សេងទៀតបានធ្លាក់នៅតំបន់បើកចំហនៃប្រទេស។ អ៊ីស្រាអែល បានវាយប្រហារតាមអាកាសលើតំបន់ជាយក្រុងបេរូត ដែលគ្រប់គ្រងដោយក្រុមហេសបូឡា នៅថ្ងៃចន្ទនេះ ជាមួយនឹងការផ្ទុះជាង ១០ដង បានធ្វើឱ្យកក្រើករដ្ឋធានីលីបង់។ អ៊ីស្រាអែល និយាយថា ខ្លួនក៏វាយប្រហារគោលដៅសមាជិកជាន់ខ្ពស់នៃក្រុមសកម្មប្រយុទ្ធហេសបូឡា នៅជិតទីក្រុងបេរូតផងដែរ។

ការវាយប្រហារសងសឹករបស់ក្រុមហេសបូឡា និងអ៊ីស្រាអែល បានពង្រីកសង្រ្គាមកាន់តែធំ ដែលបានរីករាលដាលពាសពេញមជ្ឈិមបូព៌ារួចទៅហើយ ចាប់តាំងពីសហរដ្ឋអាមេរិក និងអ៊ីស្រាអែល បានវាយប្រហារអ៊ីរ៉ង់កាលពីថ្ងៃសៅរ៍កន្លងទៅ ដោយបានធ្វើឱ្យតម្លៃប្រេងហកឡើងកប់ពពក និងធ្វើឱ្យការធ្វើដំណើរតាមផ្លូវអាកាសជួបភាពចលាចល៕