ក្រសួងការបរទេសរុស្ស៊ី បាននិយាយកាលពីថ្ងៃអាទិត្យ (១ មីនា) ថា ការបិទច្រកសមុទ្រ Hormuz មិនឱ្យមានការដឹកជញ្ជូនទំនិញ អាចនាំឱ្យមានអតុល្យភាពយ៉ាងសំខាន់លើទីផ្សារប្រេង និងឧស្ម័នសកល ដែលអាចនាំឱ្យមានវិបត្តិប្រេងយ៉ាងធ្ងន់ធ្ងរបំផុត។ ក្រសួងរុស្ស៊ី ក៏បានអំពាវនាវឱ្យមានការបន្ធូរបន្ថយភាពតានតឹងជាបន្ទាន់ បញ្ចប់ការប្រយុទ្ធគ្នា និងការវិលត្រឡប់ទៅរកកិច្ចខិតខំប្រឹងប្រែងផ្នែកនយោបាយ និងការទូតវិញ។

ប្រភពពាណិជ្ជកម្មបាននិយាយកាលពីថ្ងៃសៅរ៍ថា ម្ចាស់នាវាដឹកប្រេង ក្រុមហ៊ុនប្រេងធំៗ និងក្រុមហ៊ុនពាណិជ្ជកម្មជាច្រើន បានផ្អាកការដឹកជញ្ជូនប្រេងឆៅ ប្រេងឥន្ធនៈ និងឧស្ម័នធម្មជាតិរាវតាមរយៈច្រកសមុទ្រដ៏សំខាន់មួយនោះ បន្ទាប់ពីសហរដ្ឋអាមេរិក អ៊ីស្រាអែល និងអ៊ីរ៉ង់ បាននិយាយថា ខ្លួនបានបិទការធ្វើនាវាចរណ៍នៅដែនទឹកនោះ។

គួរឱ្យដឹងថា អត្រាប្រហែល ២០% នៃប្រេងពិភពលោក រួមទាំងពីប្រទេសផលិតប្រេងដូចជា អារ៉ាប៊ីសាអ៊ូឌីត អារ៉ាប់រួម អ៊ីរ៉ាក់ កូវ៉ែត និងអ៊ីរ៉ង់ តែងឆ្លងកាត់ច្រកសមុទ្រ Hormuz រួមជាមួយនឹងឧស្ម័នធម្មជាតិរាវមួយចំនួនធំពីប្រទេសកាតា។

អ្នកជំនាញបាននិយាយថា បើពុំមានដំណោះស្រាយរហ័សទេ នោះតម្លៃប្រេងនឹងកើនឡើងយ៉ាងគំហុកក្នុងការជួញដូរក្នុងទីផ្សារអន្តរជាតិ។ ទោះជាទំហំនៃការរំខានជាក់ស្ដែង គឺអាស្រ័យលើរយៈពេលនៃជម្លោះអ៊ីរ៉ង់ក៏ដោយ ក៏ប៉ុន្តែសម្រាប់ពេលនេះ ការគំរាមកំហែង និងភាពមិនប្រាកដប្រជានៅចំពោះមុខ គឺជាផលប៉ះពាល់យ៉ាងធ្ងន់ធ្ងរដល់លំហូរប្រេងពីតំបន់ដែលមានចំនួន ២០% នៃការផ្គត់ផ្គង់ប្រេងសកល៕