យន្តហោះចម្បាំង F-15E Strike Eagle ១គ្រឿងពីកងទ័ពអាកាសសហរដ្ឋអាមេរិក បានធ្លាក់នៅភាគខាងលិចប្រទេសគុយវ៉ែត នាថ្ងៃចន្ទ (ទី២ ខែមីនា ឆ្នាំ២០២៦) នេះ តែអ្នកបើកយន្តហោះ បានលោតចេញដោយសុវត្ថិភាពមុនពេលធ្លាក់។ 

ព័ត៌មានបឋម បង្ហាញថា ហេតុការណ៍នេះបានកើតឡើងក្នុងអំឡុងពេលប្រតិបត្តិការយោធាកំពុងបន្តមាននៅតំបន់មជ្ឈិមបូព៌ា ដែលអាចទាក់ទងនឹងភាពតានតឹងកាន់តែខ្លាំងឡើងជាមួយអ៊ីរ៉ង់។

ប្រភពជាច្រើនបានប្រាប់ឲ្យដឹងថា វីដេអូដែលមិនត្រូវបានផ្ទៀងផ្ទាត់នេះ និងដែលកំពុងត្រូវបានចែករំលែកនៅលើបណ្ដាញសង្គម បង្ហាញថា យន្តហោះបានធ្លាកចុះយ៉ាងលឿន មុនពេលមានការបុកទង្គិចយ៉ាងពេញទំហឹង ហើយ បន្ទាប់មកឃើញផ្សែងហុយទ្រលោមចេញពីកន្លែងធ្លាក់នោះ។ រូបភាពវីដេអូបន្ថែម បង្ហាញឲ្យឃើញអាកាសយានិក ដែលហាក់ដូចជាមានរបួសស្រាល កំពុងត្រូវបានជួយដោយជនស៊ីវិលគុយវ៉ែត នៅមូលដ្ឋាន។

នៅក្នុងវីដេអូមួយ ជនស៊ីវិលត្រូវបានគេឃើញដាក់អ្នកបើកយន្តហោះនោះនៅក្នុងរថយន្តផ្នែកខាងក្រោយ ខណៈពេលកំពុងទាក់ទងសេវាវេជ្ជសាស្រ្ត ដោយកំណត់អត្តសញ្ញាណរូបគេថា ជាជនជាតិអាមេរិក។

ទីបញ្ជាការកណ្តាលសហរដ្ឋអាមេរិក មិនទាន់បានចេញសេចក្តីថ្លែងការណ៍ជាផ្លូវការនៅឡើយទេ ហើយការស៊ើបអង្កេតកំពុងត្រូវបានធ្វើឡើង ដើម្បីបញ្ជាក់ពីមូលហេតុនៃការធ្លាក់នេះ។ មិនមានរបាយការណ៍អំពីការស្លាប់នោះទេ ហើយកិច្ចប្រឹងប្រែង ដើម្បីជួយអ្នកបើកយន្តហោះកំពុងបន្តធ្វើ។

ហេតុការណ៍នេះកើតឡើងស្របពេលភាពតានតឹង ក្នុងតំបន់ កាន់តែឡើងកម្ដៅខ្លាំងឡើងៗ ក្នុងនោះរួមមានទាំងវិធានការយោធាថ្មីៗរបស់សហរដ្ឋអាមេរិក និងអ៊ីស្រាអែល ប្រឆាំងនឹងគោលដៅ នៅអ៊ីរ៉ង់ ដែលបាននាំឲ្យមានការវាយប្រហារសងសឹកលើមូលដ្ឋានទ័ពអាមេរិក នៅក្នុងតំបន់ឈូងសមុទ្រ រួមទាំងនៅគុយវ៉ែតផងដែរ៕