មន្ត្រីយោធាអាមេរិកម្នាក់បាននិយាយថា យោធាអាមេរិកមិនមានគម្រោងបន្ថយការវាយប្រហាររបស់ខ្លួនលើអ៊ីរ៉ង់នោះទេ បន្ទាប់ពីមានប្រតិបត្តិការដ៏ទូលំទូលាយដែលបានធ្វើឡើងកាលពីចុងសប្តាហ៍កន្លងទៅ ដែលផ្តោតលើថ្នាក់ដឹកនាំរបស់ប្រទេស។

លោក Tim Hawkins ដែលជាអ្នកនាំពាក្យនៃទីបញ្ជាការកណ្តាលសហរដ្ឋអាមេរិក (CENTCOM) បានប្រាប់ប្រព័ន្ធផ្សព្វផ្សាយ Al Arabiya English ថា៖ «យើងពិតជាបាននិយាយថា ខ្លាំងក្លាមែន ហើយយើងពិតជាមានន័យដូច្នោះមែន»។

CENTCOM ដែលត្រួតពិនិត្យប្រតិបត្តិការយោធាអាមេរិក នៅតំបន់មជ្ឈិមបូព៌ា បានឲ្យដឹងកាលពីចុងសប្ដាហ៍កន្លងមកថា លោកប្រធានាធិបតី Donald Trump បានបញ្ជាឲ្យមានយុទ្ធនាការនេះ ដែលមានឈ្មោះថា «Operation Epic Fury» ដើម្បីការពារជនជាតិអាមេរិក ដោយលុបបំបាត់ការគំរាមកំហែងដែលបង្កឡើងដោយរបបអ៊ីរ៉ង់។

ទីបញ្ជាការនេះបានឲ្យដឹងតាមរយៈការបង្ហោះនៅលើបណ្ដាញសង្គម X ថា «លោកប្រធានាធិបតីបានបញ្ជាឲ្យអនុវត្តវិធានការយ៉ាងខ្លាំងក្លា និងច្បាស់លាស់។ កងកម្លាំង CENTCOM កំពុងធ្វើការវាយប្រហារដ៏ខ្លាំងក្លា និងឥតបង្អង់ដៃឡើយ»។ ប្រតិបត្តិការនេះបានកំណត់គោលដៅ និងសម្លាប់ថ្នាក់ដឹកនាំជាន់ខ្ពស់អ៊ីរ៉ង់ ក្នុងនោះរួមទាំងមេដឹកនាំកំពូល លោក Ali Khamenei ដែលបានដឹកនាំប្រទេសអស់រយៈពេល ៣៦ឆ្នាំ។

CENTCOM បានប្រកាសកាលពីថ្ងៃអាទិត្យ (ទី១ ខែមីនា ឆ្នាំ២០២៦) ថា ខ្លួនបានធ្វើការវាយប្រហារប្រឆាំងនឹងគោលដៅអ៊ីរ៉ង់ជាង ១.០០០គោលដៅ រហូតមកដល់ពេលនេះ ក្នុងនោះរួមទាំងការបំផ្លាញទីស្នាក់ការកណ្តាលកងកម្លាំងឆ្មាំបដិវត្តន៍ឥស្លាម (IRGC) របស់អ៊ីរ៉ង់ផងដែរ។

បើយោងតាមមន្ត្រីអាមេរិក បានឲ្យដឹងថា យ៉ាងហោចណាស់សមាជិកយោធាអាមេរិក ៣នាក់ ត្រូវបានសម្លាប់ និងជាច្រើននាក់ទៀតរងរបួសធ្ងន់ធ្ងរ អំឡុងការវាយប្រហារសងសឹករបស់អ៊ីរ៉ង់ លើគោលដៅ នៅទូទាំងតំបន់មជ្ឈិមបូព៌ា ។ អ្នកស្លាប់ និងរបួសបន្ថែមទៀត ត្រូវបានគេរំពឹងថា នឹងត្រូវបានប្រកាសនៅប៉ុន្មានថ្ងៃខាងមុខ៕