លោកឧត្តមសេនីយឯក Effie Defrin គឺជាអ្នកនាំពាក្យកងទ័ពអ៊ីស្រាអែល និយាយនៅថ្ងៃចន្ទនេះថា ជម្រើសទាំងអស់នៅលើតុល ពេលសួរថាតើអ៊ីស្រាអែលនឹងពិចារណាការវាយប្រហារតាមជើងគោកលើលីបង់ដែរឬទេ ។

អាជ្ញាធរបាននិយាយថា ការវាយប្រហាររបស់អ៊ីស្រាអែលលើប្រទេសលីបង់ បានសម្លាប់មនុស្សយ៉ាងហោចណាស់ ៣១នាក់ នៅថ្ងៃចន្ទនេះ បន្ទាប់ពីការបាញ់រ៉ុក្កែតពីក្រុមសកម្មប្រយុទ្ធហេសបូឡាដែលគាំទ្រដោយទីក្រុងតេអេរ៉ង់ ក្រោយការសម្លាប់មេដឹកនាំកំពូលរបស់អ៊ីរ៉ង់ ។

យោធាអ៊ីស្រាអែលបានសន្យាថា នឹងបង្កើនការវាយប្រហាររបស់ខ្លួនលើប្រទេសនេះ និងធ្វើឲ្យក្រុមហេសបូឡារងផលវិបាកធ្ងន់ធ្ងរ បន្ទាប់ពីបានបើកការវាយប្រហារជាច្រើនលើកនៅតំបន់ជាយក្រុងភាគខាងត្បូងនៃទីក្រុងបេរូត និងភាគខាងត្បូងប្រទេសលីបង់ គឺជាតំបន់ដែលក្រុមហេសបូឡាគ្រប់គ្រង។ 

ការកើនឡើងភាពតានតឹង បានកើតឡើង ខណៈអាជ្ញាធរលីបង់ ដែលបានព្យាយាមជួយសង្គ្រោះប្រទេសនេះពីផលវិបាកណាមួយនៃការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ បាននិយាយថា ការបាញ់រ៉ុក្កែតរបស់ហេសបូឡាបានផ្តល់លេសដល់អ៊ីស្រាអែល ដើម្បីបង្កើនការវាយប្រហាររបស់ខ្លួន ។

លោក Defrinនិយាយថា ក្រុមហេសបូឡា បានបើកការវាយប្រហារកាលពីយប់កន្លងទៅ ។ ពួកគេដឹងច្បាស់ថា អ្វីកំពុងកើតឡើង ។ ពួកយើងបានព្រមានរួចហើយ ពួកគេត្រូវតែតបស្នងចំពោះអ្វីដែលពួកគេបានធ្វើ ។ ពួកយើងបានត្រៀមខ្លួនរួចរាល់ ពួកយើងបានចល័តទាហានបម្រុងរាប់ម៉ឺននាក់ កងវរសេនាធំ កងពលតូច និងកងពលធំរាប់សិបអង្គភាព ត្រូវបានដាក់ពង្រាយ ដើម្បីការពារព្រំដែនខាងជើង ហើយនិងត្រៀមខ្លួនសម្រាប់លទ្ធភាពគ្រប់បែបយ៉ាង ៕