ក្រសួងការបរទេសចិននិយាយនៅថ្ងៃចន្ទនេះថា ជម្លោះអ៊ីរ៉ង់ បានសម្លាប់ពលរដ្ឋចិនម្នាក់នៅក្នុងរដ្ឋធានីតេអេរ៉ង់ ខណៈពលរដ្ឋជាង ៣ពាន់នាក់ ត្រូវបានជម្លៀសខ្លួន ហើយស្ថានទូត និងស្ថានកុងស៊ុលនៅប្រទេសជិតខាង បានចាត់វិធានការ ដើម្បីជួយដល់អ្នកដែលរងផលប៉ះពាល់ ។

 ការវាយប្រហាររបស់សហរដ្ឋអាមេរិក និងអ៊ីស្រាអែលចាប់តាំងពីថ្ងៃសៅរ៍ បានសម្លាប់មេដឹកនាំកំពូលអ៊ីរ៉ង់លោក Ali Khamenei បង្កឲ្យមានការវាយប្រហារសងសឹកពីអ៊ីរ៉ង់ លើអ៊ីស្រាអែល និងប្រទេសផ្សេងទៀត រួមទាំងបណ្តាប្រទេសតំបន់ឈូងសមុទ្រដែលមានមូលដ្ឋានយោធាសហរដ្ឋអាមេរិក ។

 អ្នកនាំពាក្យក្រសួងការបរទេសចិនអ្នកស្រី Mao Ning និយាយនៅក្នុងសន្និសីទសារព័ត៌មានថា ក្រុមការងារបង្កើតឡើងដោយស្ថានទូត និងស្ថានកុងស៊ុលចិន នៅប្រទេសជិតខាង នឹងទទួល និងជួយអ្នកដែលត្រូវជម្លៀសខ្លួន ប៉ុន្តែអ្នកស្រីពុំបាននិយាយពីចំនួនពិតប្រាកដនៃជនជាតិចិនដែលត្រូវបានជម្លៀសប៉ុន្មាននាក់ នឹងត្រូវវិលត្រឡប់មកប្រទេសកំណើតវិញនោះទេ ។

 អ្នកស្រី Mao និយាយថា ចិនពុំត្រូវបានគេជូនដំណឹងជាមុនពីវិធានការយោធាសហរដ្ឋអាមេរិកលើអ៊ីរ៉ង់នោះឡើយ ។ 

អ្នកស្រីបានច្រានចោលផងដែរសេចក្តីរាយការណ៍ថា អ៊ីរ៉ង់ និងចិន ជិតឈានដល់កិច្ចព្រមព្រៀង ទិញមីស៊ីលប្រឆាំងនាវាល្បឿនលឿនជាងសំឡេង ដោយអ្នកស្រីបញ្ជាក់ថា ចិនគឺជាមហាអំណាចមានទំនួលខុសត្រូវដែលតែងតែបំពេញកាតព្វកិច្ចអន្តរជាតិរបស់ខ្លួន ៕