ស៊ីហ្គេម៖ នៅព្រឹកថ្ងៃទី២៣ ខែមីនាម្សិលមិញ សកលវិទ្យាធិការសកលវិទ្យាល័យភូមិន្ទភ្នំពេញបានចុះហត្ថលេខា លើអនុសារណៈជាមួយសកលវិទ្យាធិការសកលវិទ្យាល័យកីឡាជាតិកូរ៉េខាងត្បូង ដើម្បីអភិវឌ្ឍន៍ធនធានកីឡាករកម្ពុជា ឆ្ពោះទៅកាន់ការដណ្តើមមេដាយ នៅក្នុងឱកាសកម្ពុជាធ្វើម្ចាស់រៀបចំកីឡា SEA GAME ឆ្នាំ២០២៣។
ឯកឧត្តម ជេត ជាលី សកលវិទ្យាធិការសកលវិទ្យាល័យភូមិន្ទភ្នំពេញបានថ្លែងប្រាប់ឱ្យដឹងថា នៅក្នុងដំណើរការចុះហត្ថលេខានេះ សកលវិទ្យាល័យភូមិន្ទភ្នំពេញគ្រាន់តែដើរតួធ្វើជាស្ពានឲ្យសកលវិទ្យាល័យកីឡាជាតិកូរ៉េ ចូលរួមជួយអភិវឌ្ឍន៍វិស័យកីឡានៅកម្ពុជាមានការរីកចំរើន ឆ្ពោះទៅកាន់ការដណ្តើមមេដាយនៅក្នុងឱកាសកម្ពុជាធ្វើម្ចាស់រៀបចំកីឡា SEA GAME ឆ្នាំ២០២៣។ បើតាមលោក Yong-kyu Ahn សកលវិទ្យាធិការសកលវិទ្យាល័យកីឡាជាតិកូរ៉េថ្លែងថា សកលវិទ្យាល័យកីឡាជាតិកូរ៉េបាននឹងកំពុងផ្តល់ការបណ្តុះបណ្តាលកីឡាថ្នាក់បរិញ្ញាបត្រ និងបរិញ្ញាបត្រជាន់ខ្ពស់លើកីឡាប្រមាណជាង ៤៧ប្រភេទកីឡា ហើយនៅក្នុង MoU ដំណាក់កាលដំបូងនេះ សកលវិទ្យាល័យកីឡាជាតិកូរ៉េនឹងផ្តល់អាហារូបករណ៍ជូនកីឡាករកម្ពុជាប្រមាណ ២០រូបទៅហ្វឹកហ្វឺនកីឡាចំនួន ៤ប្រភេទរួមមាន៖ កីឡាតៃក្វាន់ដូរ យូដូ គុនដាវ និងកីឡាប្រដាល់ជាដើម។
ឯកឧត្តម អ៊ុក សិទ្ធិជាតិ អគ្គនាយក អគ្គនាយកដ្ឋានកីឡាបញ្ជាក់បន្ថែមថា កីឡាករ-កីឡាការិនី ២០នាក់ដែលនឹងត្រូវបញ្ជួនទៅហ្វឹកហាត់រយៈពេលខ្លីនៅកូរ៉េខាងត្បូង មុនស៊ីហ្គេមចូលមកដល់ជាប្រភេទកីឡាសក្តានុពល និងដែលជាកីឡាជំនាញរបស់សកលវិទ្យាល័យកីឡាជាតិកូរ៉េ ដែលកន្លងមកបានបណ្តុះបណ្តាលម្ចាស់មេដាយអូឡាំពិកជាច្រើន។ សូមជម្រាបជូនថា ក្រៅពីការចុះ MoU ជួយបង្ហាត់ហ្វឹកហ្វឺនកីឡាដល់កម្ពុជានេះដែរ ក្រសួងអប់រំ យុវជន និងកីឡា ក៏បានស្នើអោយសកលវិទ្យាល័យកីឡាជាតិកូរ៉េ ជួយផ្តល់ការបណ្តុះបណ្តាលផ្នែកវិទ្យាសាស្ត្រកីឡា និងផ្តល់សំភារៈកីឡា មានដូចជាម៉ាស៊ីនតេស្តសមត្ថភាពអ៊ុកស៊ីសែន តេស្តកម្លាំងកីឡាករនៅពេលធ្វើលំហាត់ និងផ្តល់គ្រូហ្វឹកហ្វឺនទៅតាមលទ្ធភាពដែលធ្វើបាន៕
អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
