យន្តហោះអាមេរិកចំនួន ១៥គ្រឿង បានចាកចេញពីមូលដ្ឋានយោធា នៅទីក្រុង Rota និង Moron ភាគខាងត្បូងប្រទេសអេស្ប៉ាញ ចាប់តាំងពីសហរដ្ឋអាមេរិក និងអ៊ីស្រាអែល បានបើកការវាយប្រហារកាលពីចុងសប្តាហ៍កន្លងមក លើអ៊ីរ៉ង់។ នេះបើយោងតាមការបង្ហាញដោយគេហទំព័រតាមដានជើងហោះហើរ FlightRadar24 នាថ្ងៃចន្ទ (ទី២ ខែមីនា ឆ្នាំ២០២៦) នេះ។

រដ្ឋមន្ត្រីការបរទេស លោក Jose Manuel Albares បាននិយាយថា ប្រទេសអេស្ប៉ាញនឹងមិនអនុញ្ញាតឲ្យមូលដ្ឋានយោធារបស់ខ្លួន ដែលដំណើរការរួមគ្នាដោយសហរដ្ឋអាមេរិក និងអេស្ប៉ាញ ប៉ុន្តែស្ថិតនៅក្រោមអធិបតេយ្យភាពរបស់អេស្ប៉ាញនើ ត្រូវបានប្រើប្រាស់ ដើម្បីវាយប្រហារអ៊ីរ៉ង់ ដែលប្រទេសអេស្ប៉ាញបានថ្កោលទោស។

យ៉ាងហោចណាស់យន្តហោះចំនួន ៧គ្រឿង ត្រូវបានបង្ហាញនៅលើវេបសាយ FlightRadar24 ថា បានចុះចតនៅមូលដ្ឋានទ័ពអាកាស Ramstein ក្នុងប្រទេសអាល្លឺម៉ង់។

គោលជំហររបស់អេស្ប៉ាញ និងការថ្កោលទោសយ៉ាងខ្លាំង ចំពោះវិធានាការ រវាងសហរដ្ឋអាមេរិក និងអ៊ីស្រាអែល នៅអ៊ីរ៉ង់ ដោយនាយករដ្ឋមន្ត្រីសង្គមនិយម លោក Pedro Sanchez ជាថ្មីម្តងទៀតធ្វើឲ្យប្រទេសនេះផ្ទុយនឹងប្រទេសជាច្រើន នៅក្នុងតំបន់ ដែលអាចធ្វើឲ្យទំនាក់ទំនងរបស់ខ្លួនជាមួយទីក្រុងវ៉ាស៊ីនតោនកាន់តែអាប់អួ។

លោក Albares បានលើកឡើងនៅក្នុងបទសម្ភាសន៍ជាមួយទូរទស្សន៍អេស្ប៉ាញ Telecinco ថា៖ «មូលដ្ឋានទ័ពអេស្ប៉ាញ មិនត្រូវបានប្រើប្រាស់ សម្រាប់ប្រតិបត្តិការនេះទេ ហើយពួកវានឹងមិនត្រូវបានប្រើប្រាស់ សម្រាប់អ្វីដែលមិនត្រូវបានរាប់បញ្ចូលក្នុងកិច្ចព្រមព្រៀងជាមួយសហរដ្ឋអាមេរិក ឬសម្រាប់អ្វីដែលមិនស្របតាមធម្មនុញ្ញរបស់អង្គការសហប្រជាជាតិនោះឡើយ»។

ដំបូងឡើយ ប្រទេសអង់គ្លេសក៏បានបដិសេធមិនអនុញ្ញាតឲ្យប្រើប្រាស់មូលដ្ឋានរបស់ខ្លួនដែរ សម្រាប់ការវាយប្រហារលើប្រទេសអ៊ីរ៉ង់ ប៉ុន្តែកាលថ្ងៃអាទិត្យ នាយករដ្ឋមន្ត្រី លោក Keir Starmer បានយលើព្រមឲ្យប្រើប្រាស់មូលដ្ឋានរបស់ពួកគេ សម្រាប់ «ការការពារខ្លួនរួមគ្នា»៕