ក្រុមហ៊ុនថាមពលរដ្ឋកាតា និយាយថា ពួកគេបានផ្អាកការផលិតឧស្ម័នធម្មជាតិរាវ LNG ក្រោយការវាយប្រហាររបស់អ៊ីរ៉ង់ ធ្វើឲ្យហ្គាសឡើងថ្លៃនៅអឺរ៉ុប ស្របពេលអារ៉ាប៊ីសាអ៊ូឌីត បានប្រកាសថា ខ្លួនបានបិទបណ្តោះអាសន្នរោងចក្រចម្រាញ់ប្រេង Ras Tanura ដែលស្ថិតជិតតំបន់ភាគខាងកើតប្រទេស បន្ទាប់ពីវាកើតជាអគ្គិភ័យ ដោយសារការវាយប្រហារយានដ្រូន ។

ក្រុមហ៊ុនផលិតឧស្ម័នធម្មជាតិរាវ LNG ធំបំផុតរបស់ពិភពលោកនេះ និយាយនៅក្នុងសេចក្តីថ្លែងការណ៍ថា ដោយសារការវាយប្រហារយោធាលើរោងចក្រប្រតិបត្តិការរបស់ក្រុមហ៊ុន QatarEnergy នៅទីក្រុងឧស្សាហកម្ម Ras Laffan និងទីក្រុងឧស្សាហកម្ម Mesaieed ស្ថិតក្នុងរដ្ឋកាតា ក្រុមហ៊ុន QatarEnergy បានបញ្ឈប់ការផលិតឧស្ម័នធម្មជាតិរាវ LNG ហើយនិងផលិតផលពាក់ព័ន្ធ ។

ភ្លាមៗក្រោយសេចក្តីប្រកាស តម្លៃហ្គាសនៅអឺរ៉ុប បានហក់ឡើងខ្ពស់ជិត ៥០ភាគរយ ។

មុននេះ ក្រសួងការពារជាតិកាតា និយាយថា ប្រទេសរបស់ពួកគេ រងការវាយប្រហារដោយយានដ្រូន ២គ្រឿង បាញ់បង្ហោះចេញពីអ៊ីរ៉ង់ ។

ក្រសួងបាននិយាយនៅក្នុងសេចក្តីថ្លែងការណ៍ថា យានដ្រូនមួយគ្រឿង មានគោលដៅសឺទែនទឹករបស់រោងចក្រថាមពល Mesaieed និងយានដ្រូន ១គ្រឿងទៀត មានគោលដៅលើរោងចក្រថាមពលនៅទីក្រុងឧស្សាហកម្ម Ras Laffan របស់ក្រុមហ៊ុន QatarEnergy ដោយពួកគេពុំបានរាយការណ៍ពីគ្រោះថ្នាក់ដល់អាយុជីវិតមនុស្សនោះទេ ។

ពួកគេបន្តថា ការខូចខាត និងការបាត់បង់ទាំងអស់ ពីការវាយប្រហារនេះ នឹងត្រូវវាយតម្លៃដោយអាជ្ញាធរពាក់ព័ន្ធ ហើយសេចក្តីថ្លែងការណ៍ផ្លូវការ នឹងត្រូវចេញតាមក្រោយ ។

ដោយឡែក ក្រុមហ៊ុនប្រេងរដ្ឋអារ៉ាប៊ីសាអ៊ូឌីត Aramco បានបិទរោងចក្រចម្រាញ់ប្រេង Ras Tanura របស់ខ្លួនផងដែរ ក្រោយរងការវាយប្រហារដោយយានដ្រូន នៅថ្ងៃទី ៣ នៃការវាយប្រហារនៅទូទាំងតំបន់ដោយទីក្រុងតេអេរ៉ង់ ជាការឆ្លើយតបនឹងការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ ៕