សមាជិកបក្សសាធារណរដ្ឋរបស់លោកប្រធានាធិបតីអាមេរិក Donald Trump បានទទូចកាលពីថ្ងៃចន្ទ (២ មីនា) ថា ការវាយប្រហារលើអ៊ីរ៉ង់ គឺស្ថិតក្នុងសិទ្ធិអំណាចរបស់ប្រធានាធិបតីទាំងស្រុងក្នុងនាមជាអគ្គមេបញ្ជាការ ខណៈសមាជិកបក្សប្រជាធិបតេយ្យ ប្រកែកថា រដ្ឋបាលមិនបានលើកពីអំណះអំណាងរបស់ខ្លួនគ្រប់គ្រាន់ទេ ហើយបានរៀបផែនការបោះឆ្នោតលើអំណាចសង្គ្រាម ក្នុងសប្តាហ៍នេះ។

រដ្ឋមន្ត្រីការបរទេសអាមេរិក លោក Marco Rubio រដ្ឋមន្ត្រីការពារជាតិ Pete Hegseth នាយក CIA រួមទាំងមន្រ្តីជាន់ខ្ពស់ជាច្រើនរូបទៀត បានបើកកិច្ចប្រជុំដើម្បីរាយការណ៍ជូនថ្នាក់ដឹកនាំសភាអំពីការវាយប្រហារលើអ៊ីរ៉ង់ កាលពីថ្ងៃចន្ទ ពោលគឺរយៈពេលពីរថ្ងៃបន្ទាប់ពីកងកម្លាំងអ៊ីស្រាអែល និងអាមេរិក បានព្រួតដៃគ្នាទម្លាក់គ្រាប់បែកលើអ៊ីរ៉ង់។ កិច្ចប្រជុំបន្ថែមទៀតត្រូវបានគ្រោងទុកសម្រាប់ថ្ងៃអង្គារនេះ។

លោក Rubio លើកអំណះអំណាងថា មានការគំរាមកំហែងដែលជិតមកដល់ចំពោះអាមេរិក ពីព្រោះអាមេរិកដឹងថា អ៊ីស្រាអែលមានគម្រោងវាយប្រហារអ៊ីរ៉ង់ ហើយរំពឹងថា អ៊ីរ៉ង់នឹងសងសឹកវិញដោយវាយប្រហារកងកម្លាំងអាមេរិក។ សមាជិកសភាបក្សសាធារណរដ្ឋផ្សេងទៀតនិយាយថា ដោយសារតែហេតុនេះហើយ ទើបនាំឱ្យមាន «ការគំរាមកំហែងដែលជិតមកដល់» ដែលបង្ខំឱ្យអាមេរិក ឆ្លើយតប។

នៅចុងសប្តាហ៍នេះ សមាជិកសភាអាមេរិកត្រូវបានរំពឹងថានឹង បោះឆ្នោតលើសេចក្តីសម្រេចស្តីពីអំណាចសង្គ្រាម ដែលអាចរារាំងលោក Trump មិនឱ្យបន្តវាយប្រហារអ៊ីរ៉ង់ ដោយពុំមានការប្រកាសសង្គ្រាមពីសភានោះឡើយ។ សមាជិកបក្សប្រជាធិបតេយ្យអះអាងថា រដ្ឋធម្មនុញ្ញអាមេរិក ផ្តល់សិទ្ធិផ្តាច់មុខដល់សភាក្នុងការប្រកាសសង្គ្រាម មិនមែនប្រធានាធិបតីនោះទេ ហើយថា លោក Trump មិនគួរបើកយុទ្ធនាការដែលអាចច្រើនសប្តាហ៍បែបនេះ ដោយពុំមានការយល់ព្រមពីសមាជិកសភាឡើយ។

ពួកគេបន្តថា រដ្ឋបាលផ្តល់ហេតុផលជាច្រើនសម្រាប់ការវាយប្រហារ ដោយដំបូងគឺការបំផ្លាញកម្មវិធីនុយក្លេអ៊ែរ បន្ទាប់មកគឺការបញ្ចប់ការអភិវឌ្ឍមីស៊ីលបាលីស្ទិក ការផ្លាស់ប្តូររបប ហើយឥឡូវនេះ គឺដើម្បីបំផ្លាញកងនាវាចររបស់អ៊ីរ៉ង់ ប៉ុន្តែក្រុមជំនួយការជាន់ខ្ពស់របស់លោក Trump មិនបានលើកអំណះអំណាងដ៏គួរឱ្យជឿជាក់មួយថា អាមេរិកពិតជាប្រឈមមុខនឹងការគំរាមកំហែងភ្លាមៗនោះទេ៕