អ្នកសារព័ត៌មានម្នាក់ដែលបានបង្ហោះនៅលើបណ្តាញ X ដោយដកស្រង់បទសម្ភាសន៍ជាមួយលោកTrump បាននិយាយថា លោក Trump បានប្រាប់សារព័ត៌មាន NewsNation ថា អ្នកនឹងដឹងក្នុងពេលឆាប់ៗនេះថា តើការសងសឹកនឹងទៅជាយ៉ាងណា ក្នុងការឆ្លើយតបទៅនឹងការវាយប្រហារលើស្ថានទូតសហរដ្ឋអាមេរិកក្នុងទីក្រុង Riyadh ប្រទេសអារ៉ាប៊ីសាអ៊ូឌីត និងជុំវិញការស្លាប់បុគ្គលិកយោធាសហរដ្ឋអាមេរិកក្នុងអំឡុងពេលជម្លោះជាមួយអ៊ីរ៉ង់។

អ្នកសារព័ត៌មាន អ្នកស្រី Kellie Meyer បាននិយាយនៅក្នុងសាររបស់អ្នកស្រីថា លោកTrump បាននិយាយថា លោកមិនគិតថា វត្តមានកងទ័ពជាក់ស្តែង នឹងចាំបាច់នោះទេ»។ ក្រសួងការពារជាតិរបស់ប្រទេសអារ៉ាប៊ីសាអ៊ូឌីត បាននិយាយនៅក្នុងសារមួយនៅលើបណ្តាញ X ថា ស្ថានទូតសហរដ្ឋអាមេរិក នៅទីក្រុង Riyadh ត្រូវបានវាយប្រហារដោយយានដ្រូនពីរគ្រឿង បណ្តាលឱ្យមានអគ្គិភ័យ និងខូចខាតសម្ភារៈមួយចំនួន។

ស្ថានទូតសហរដ្ឋអាមេរិកនៅអារ៉ាប៊ីសាអ៊ូឌីត បានចេញសេចក្តីជូនដំណឹងអំពីការជ្រកកោននៅនឹងកន្លែង ដោយអាជ្ញាធរសហរដ្ឋអាមេរិកបានជំរុញឱ្យជនជាតិអាមេរិកនៅក្នុងទីក្រុងនានាក្នុងប្រទេសអារ៉ាប៊ីសាអ៊ូឌីត ជ្រកកោននៅនឹងកន្លែង និងបញ្ចៀសពីស្ថានទូតរបស់ប្រទេសនៅទីក្រុង Riyadh បន្ទាប់ពីទីកន្លែងនោះត្រូវបានវាយប្រហារដោយយានដ្រូន។

បេសកកម្មសហរដ្ឋអាមេរិកប្រចាំប្រទេសអារ៉ាប៊ីសាអ៊ូឌីត បានចេញសេចក្តីជូនដំណឹងស្តីពីការជ្រកកោននៅនឹងកន្លែងសម្រាប់ទីក្រុងJeddah ទីក្រុងRiyadh និងទីក្រុងDhahran ហើយកំពុងកំណត់ការធ្វើដំណើរដែលមិនចាំបាច់ទៅកាន់ទីតាំងយោធាណាមួយនៅក្នុងតំបន់។