ក្រសួងការបរទេសសហរដ្ឋអាមេរិក បានជំរុញឱ្យពលរដ្ឋអាមេរិកទាំងអស់ចាកចេញជាបន្ទាន់ពីបណ្តាប្រទេសជាងដប់នៅតំបន់មជ្ឈិមបូព៌ា រួមមានទាំងប្រទេសអារ៉ាប៊ីសាអ៊ូឌីត និងកាតា ក្នុងពេលមានការវាយប្រហារកាន់តែខ្លាំងឡើងរវាងសហរដ្ឋអាមេរិក និងអ៊ីស្រាអែល ទៅលើប្រទេសអ៊ីរ៉ង់។

ការព្រមានដែលបានចេញកាលពីថ្ងៃចន្ទ ធ្វើឡើងបន្ទាប់ពីក្រសួងការបរទេសក្នុងរយៈពេលប៉ុន្មានថ្ងៃថ្មីៗនេះ បានធ្វើបច្ចុប្បន្នភាពការណែនាំអំពីការធ្វើដំណើរសម្រាប់ប្រទេសជាច្រើននៅក្នុងតំបន់នោះ ដោយណែនាំកុំឱ្យធ្វើដំណើរ។ ការណែនាំចុងក្រោយ អនុវត្តចំពោះប្រទេសបារ៉ែន អេហ្ស៊ីប អ៊ីរ៉ង់ អ៊ីរ៉ាក់ អ៊ីស្រាអែល តំបន់កាន់កាប់វ៉េសប៊ែង តំបន់ហ្កាហ្សា ហ្ស៊កដានី គុយវ៉ែត លីបង់ អូម៉ង់ កាតា អារ៉ាប៊ីសាអូឌីត ស៊ីរី អារ៉ាប់រួម និងប្រទេសយេម៉ែន។

នៅក្នុងសេចក្តីថ្លែងការណ៍ដែលបានបង្ហោះនៅលើបណ្តាញ X លោកស្រី Mora Namdar ឧបការីរដ្ឋមន្ត្រីទទួលបន្ទុកកិច្ចការកុងស៊ុលរបស់ក្រសួងការបរទេសបាននិយាយថា ពលរដ្ឋអាមេរិកគួរតែ «ចាកចេញឥឡូវនេះ» ពីប្រទេសដែលបានចុះបញ្ជីដោយប្រើប្រាស់ការដឹកជញ្ជូនពាណិជ្ជកម្មដែលមាន «ដោយសារតែហានិភ័យសុវត្ថិភាពធ្ងន់ធ្ងរ»។

ស្ថានទូតសហរដ្ឋអាមេរិកនៅទីក្រុងអាម៉ាន់ ប្រទេសហ្ស៊កដានី បានប្រកាសកាលពីថ្ងៃចន្ទថា បុគ្គលិករបស់ខ្លួនបានចាកចេញពីទីតាំងការទូត «ដោយសារតែការគំរាមកំហែង»។ អ្នកស្រី Patty Culhane បុគ្គលិកសារព័ត៌មាន Al Jazeera ដែលរាយការណ៍ពីទីក្រុងវ៉ាស៊ីនតោនឌីស៊ី បានកត់សម្គាល់ពីលក្ខណៈមិនធម្មតានៃការប្រកាសនៅលើបណ្តាញផ្សព្វផ្សាយសង្គមដោយមន្ត្រីក្រសួងការបរទេស។