ការលុបចោលជើងហោះហើរទៅ និងមកពីមជ្ឈិមបូព៌ាបន្តកើនឡើង ខណៈការបិទដែនអាកាស និងអាកាសយានដ្ឋានក្នុងតំបន់ បណ្តាលមកពីសង្គ្រាមរវាងអ៊ីស្រាអែល អ៊ីរ៉ង់ និងសហរដ្ឋអាមេរិក ចូលដល់ថ្ងៃទី៤គិតមកដល់ថ្ងៃ៣មីនាសប្ដាហ៍នេះ។ទិន្នន័យពីក្រុមហ៊ុនវិភាគអាកាសចរណ៍ Cirium បង្ហាញថា ជើងហោះហើរជាង២.០០០ ទៅកាន់មជ្ឈិមបូព៌ាត្រូវបានលុបចោលកាលពីថ្ងៃទី១មីនា តំណាងឱ្យពាក់កណ្តាលនៃជើងហោះហើរដែលបានកំណត់សម្រាប់ថ្ងៃនោះ។តួលេខនេះគឺជាការកើនឡើងគួរឱ្យកត់សម្គាល់ពីថ្ងៃមុន ដែលជើងហោះហើរត្រូវបានលុបចោលប្រហែល២៤% នៃជើងហោះហើរទាំងអស់។ដែនអាកាសទទេស្អាតនៅលើតំបន់មជ្ឈិមបូព៌ា នៅព្រឹកថ្ងៃអង្គារ៣មីនានេះ ។

កងកម្លាំងអាមេរិក និងអ៊ីស្រាអែលបានវាយប្រហារអ៊ីរ៉ង់នៅថ្ងៃទី២៨ កុម្ភៈ ដោយទីក្រុងតេអេរ៉ង់បានឆ្លើយតបមួយថ្ងៃក្រោយមកដោយការបាញ់មីស៊ីលទៅលើមូលដ្ឋានទ័ពអាមេរិកនៅអារ៉ាប់រួម កាតា បារ៉ែន ហ្ស៊កដានី និងគុយវ៉ែត។

ជម្លោះបានធ្វើឱ្យចរាចរណ៍ផ្លូវអាកាសនៅមជ្ឈមណ្ឌលសំខាន់ៗនៅមជ្ឈិមបូព៌ាចុះខ្សោយ ដោយប្រតិបត្តិករសំខាន់ៗដូចជាក្រុមហ៊ុនអាកាសចរណ៍ Emirates និង Qatar Airways បានផ្អាកប្រតិបត្តិការរហូតដល់ពេលនេះ។ ក្រុមហ៊ុនអាកាសចរណ៍ Emirates និយាយថា ប្រតិបត្តិការរបស់ខ្លួនត្រូវបានផ្អាករហូតដល់ម៉ោង ១៥:០០ ម៉ោងក្នុងស្រុក ខណៈក្រុមហ៊ុនអាកាសចរណ៍ Etihad Airways មានមូលដ្ឋាននៅទីក្រុង Abu Dhabi បានផ្អាកជើងហោះហើរទាំងអស់រហូតដល់ម៉ោង១៤:០០ ម៉ោងក្នុងស្រុក។ ក្រុមហ៊ុនអាកាសចរណ៍ Qatar Airways បានបន្តលុបចោលជើងហោះហើររបស់ខ្លួនរហូតដល់ថ្ងៃទី៣មីនានេះ។

ក្រុមហ៊ុនអាកាសចរណ៍ពាណិជ្ជកម្មជាតិ El Al របស់អ៊ីស្រាអែល បានលុបចោលជើងហោះហើររហូតដល់ថ្ងៃទី៤មីនា។ដែនអាកាសលើអ៊ីរ៉ង់ អ៊ីស្រាអែល អ៊ីរ៉ាក់ កាតា បារ៉ែន គុយវ៉ែត និងស៊ីរីនៅតែបិទ ដោយដែនអាកាសមួយចំនួននៅអារ៉ាប់រួម និងអារ៉ាប៊ីសាអ៊ូឌីតត្រូវបានបើកដោយផ្នែក។ទន្ទឹមនឹងនេះ ក្រុមហ៊ុនអាកាសចរណ៍ទូទាំងពិភពលោកបានផ្អាកជើងហោះហើរទៅកាន់មជ្ឈិមបូព៌ារយៈពេលយូរ។ ក្រុមហ៊ុនអាកាសចរណ៍អាស៊ីដែលប្រតិបត្តិការទៅកាន់អឺរ៉ុបក៏ត្រូវផ្លាស់ប្តូរផ្លូវប្រតិបត្តិការដើម្បីជៀសវាងតំបន់ជម្លោះផងដែរ៕