ភ្នំពេញ ៖ រយៈពេល១ឆ្នាំ២០១៨នេះ ការនាំចេញសរុបរបស់កម្ពុជាគិតជាទឹកប្រាក់នឹងសម្រេចបានអត្រាកំណើនដល់ទៅ១៥% ។ នេះបើតាមតួលេខពីក្រសួងពាណិជ្ជកម្មដែលប៊ីធីវី ទទួលបានកាលពីថ្ងៃទី២៧ ខែសីហា ម្សិលមិញនេះ ។
ឯកឧត្តម ឱក ប៊ុង រដ្ឋលេខាធិការក្រសួងពាណិជ្ជកម្មកម្ពុជា បានថ្លែងថា ការនាំចេញពីកម្ពុជាក្នុងឆ្នាំ២០១៨ នឹងសម្រេចបានក្នុងទឹកប្រាក់ប្រមាណ១ ម៉ឺន២ ពាន់លានដុល្លារ ជាមួយនឹងអត្រាកំណើន១៥% ធៀប នឹងការនាំចេញរយៈពេលដូចគ្នា កាលពីឆ្នាំ២០១៧ កន្លងទៅដែលសម្រេចបានក្នុងទឹកប្រាក់ជាង១ ម៉ឺន១ ពាន់លានដុល្លារអាមេរិក។
ឯកឧត្តម បានថ្លែងបញ្ជាក់ថា ការរំពឹងពីកំណើននៃការនាំចេញឆ្នាំនេះ ដោយយោងទៅលើស្ថានភាពល្អប្រសើរនៃទីផ្សារនាំចេញសំខាន់របស់កម្ពុជាដូចជាទីផ្សារសហគមន៍អឺរ៉ុប និងសហរដ្ឋអាមេរិក ជប៉ុន និងទីផ្សារប្រទេសកាណាដាជាដើម។
ចំណែក ឯកឧត្តម បណ្ឌិត ហ៊ាន វណ្ណហ៊ន អគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្ម បានថ្លែងថា ការចរចាជាមួយសហភាពអឺរ៉ុប គឺជារឿងដែលមិនមានការលំបាកនោះទេ ប្រសិនបើគ្មានការជ្រៀតជ្រែក ខាងផ្នែកនយោបាយនោះទីផ្សារអង្ករកម្ពុជានឹងរឹតតែល្អប្រសើរនៅឆ្នាំនេះ។
ឯកឧត្តម បានថ្លែងទៀតថា បច្ចុប្បន្នកម្ពុជាកំពុងពិភាក្សាជាមួយ នឹងសហភាពអឺរ៉ុបដើម្បីពិភាក្សានិងជំរុញការនាំចេញ ដោយសារការនាំចេញរបស់កម្ពុជាគឺផ្អែកលើកិច្ចព្រមព្រៀង EBA ផងដែរ។ សម្រាប់ទំនិញនាំចេញសំខាន់ៗរបស់កម្ពុជា មានដូចជា ផលិតផលវាយនភណ្ឌ កាត់ដេរ តំណាងដល់ទៅរង្វង់៧០% នៃទំនិញនាំចេញសរុបរបស់កម្ពុជាក្រៅពីនេះ មានដូចជា អង្ករ កៅស៊ូ គ្រឿង ដង្គុំ អេឡិចត្រូនិក និងកសិផលមួយចំនួនទៀត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
