​អាមេរិក៖ ប្រមុខ​យោធា​សហរដ្ឋអាមេរិក បាន​និយាយ​កាលពី​ថ្ងៃ​អង្គា​រថា ​កូរ៉េខាងជើង​អាច​នឹង​ចាប់ផ្ដើម​ការ​បាញ់​សាកល្បង​ មី​ស៊ី​ល​អន្តរទ្វីប​បាលី​ស្ទីក​ដែល​ទើប​ចេញ​គំរូ​ថ្មី នៅ​ក្នុង​ពេល​ដ៏​ខ្លី​ខាង​មុខ​។

​លោក​ឧត្ដមសេនីយ៍​យោធា Glen VanHerck បាន​ប្រាប់​គណៈកម្មការ​យោធា​ព្រឹទ្ធ​សភាព​ថា របប​កូរ៉េខាងជើង​ក៏បាន​ចង្អុល​បង្ហាញ​ផង​ដែរ​ថា ខ្លួន​លែង​ជាប់​គំនាប​ផ្អាក​ការសាកល្បង នុយក្លេអ៊ែរ និង ICBM ​ជា​ឯកតោភាគីដែល​បាន​ប្រកាស​កាលពី​ឆ្នាំ​២០១៨ នោះ​ទៀតហើយ​ ដោយ​លើក​ឡើង​ថា លោក Kim Jong Un អាច​បាញ់​បង្ហោះ​មី​ស៊ី​ល​អន្តរទ្វីប ICBM ដែល​ទើប​ផលិត​រួចនៅ​ក្នុង​ពេល​ឆាប់ៗ​ខាងមុខនេះ​។ កាលពី​ ៣​ឆ្នាំមុនកូរ៉េខាងជើង​ធ្លាប់​បាន​សន្យា​ផ្អាក​ជា​ឯកតោភាគី ក្នុង​ការ​សាកល្បងមី​ស៊ី​ល ICBM និង​អាវុធ​នុយក្លេអ៊ែរ​។ មន្ត្រី​ក្រសួងការពារជាតិ​អាមេរិក​មួយ​រូប បាន​ប្រាប់​ស្ថានីយ​ទូរទស្សន៍ NBC News ថា​ សហរដ្ឋ​អាមេរិក​ដឹង​ពី​ការ​បង្កើន​សកម្មភាព​រថយ​ន្ត នៅ​ទីតាំង​មួយ​ជាទី​ដែល​ធ្លាប់​មាន​ប្រវត្តិ​បាញ់​មី​ស៊ី​ល​។

មន្ត្រី​រូប​នោះ​ពុំបាន​គូស​បញ្ជាក់​ពី​ការ​ ចង្អុល​បង្ហាញ​កម្រិត​នៃ​ការ​បាញ់​នោះ​ទេ​។ ហើយ​សហរដ្ឋ​អាមេ​រិក​កំពុង​បន្ត​តាមដាន ស្ថានការណ៍​នេះ​យ៉ាង​យកចិត្តទុកដាក់​។​ គួរ​ឲ្យ​ដឹង​ថា ​ការ​លើកឡើង​ពី​ការ​ប៉ាន់​ប្រមាណ​ថា​ កូរ៉េខាងជើង​អាច​នឹង​បាញ់​មី​ស៊ី​ល​មាន​ឡើង ​ខណៈ​ដែលរដ្ឋមន្ត្រី​ក្រសួង​ការ​ពារជាតិ​អាមេរិក លោក Lloyd Austin បាន​ទៅដល់​ទឹកដី​កូរ៉េខាងត្បូងនៅ​ថ្ងៃ​ពុធ​នេះ ដើម្បី​ពិភាក្សា​ពី​បញ្ហា​ទ្វេភាគី និង​ក្ដី​បារម្ភ​សកល ដូចជា​បញ្ហា​កូរ៉េខាងជើង និង​ការផ្ទេរ​ការគ្រប់គ្រង​ប្រតិបត្តិការ​ក្នុង​ពេល​សង្គ្រាម​ជាដើម​៕

អត្ថបទ៖ សុខមាន