លោក Rubio រដ្ឋមន្ត្រីការបរទេសសហរដ្ឋអាមេរិក បាននិយាយកាលពីថ្ងៃចន្ទ ទី២ ខែមីនា ថា សហរដ្ឋអាមេរិក នឹងចាត់វិធានការដើម្បីកាត់បន្ថយការកើនឡើងតម្លៃថាមពលដោយសារតែការកើនឡើងតម្លៃប្រេងបណ្តាលមកពីជម្លោះអ៊ីរ៉ង់។

ថ្លែងទៅកាន់អ្នកសារព័ត៌មាននៅ Capitol Hill លោក Rubio បាននិយាយថា រដ្ឋមន្ត្រីក្រសួងរតនាគារ លោក Scott Bessent និងរដ្ឋមន្ត្រីក្រសួងថាមពល លោក Chris Wright នឹងប្រកាសផែនការ នៅថ្ងៃអង្គារនេះ។

លោក Rubio និយាយថា «ចាប់ពីថ្ងៃស្អែកតទៅ អ្នកនឹងឃើញយើងដាក់ចេញដំណាក់កាលទាំងនោះដើម្បីព្យាយាមកាត់បន្ថយផលប៉ះពាល់ ដោយយើងរំពឹងថានេះ អាចជាបញ្ហាមួយ»។

តម្លៃប្រេង និងឧស្ម័ន បានកើនឡើងកាលពីថ្ងៃចន្ទ បន្ទាប់ពីការវាយប្រហាររបស់អ៊ីស្រាអែល និងសហរដ្ឋអាមេរិក ទៅលើប្រទេសអ៊ីរ៉ង់ និងការសងសឹកដោយទីក្រុងតេអេរ៉ង់ បានបង្ខំឱ្យបិទរោងចក្រប្រេងនិងឧស្ម័ន នៅទូទាំងតំបន់ និងរំខានដល់ការដឹកជញ្ជូនប្រេងនៅច្រកសមុទ្រ Hormuz ដ៏សំខាន់។