អ៊ីរ៉ង់ និងក្រុមតំណាងរបស់ខ្លួនអាចវាយប្រហារលើសហរដ្ឋអាមេរិក ក្នុងមធ្យោបាយផ្សេងៗ ជាការឆ្លើយតបទៅនឹងការសម្លាប់មេដឹកនាំកំពូលអ៊ីរ៉ង់ លោក Ali Khamenei កាលពីថ្ងៃសៅរ៍ចុងសប្ដាហ៍មុន ក្នុងការវាយប្រហារច្រកអាកាសដ៏ខ្លាំងក្លារបស់អ៊ីស្រាអែល និងអាមេរិក នេះបើតាមរបាយការណ៍វាយតម្លៃរបស់ទីភ្នាក់ងារចារកម្មសម្ងាត់អាមេរិក ដែលត្រូវបានពិនិត្យដោយសារព័ត៌មានរ៉យទ័រ។

របាយការណ៍វាយតម្លៃការគំរាមកំហែង ចុះកាលបរិច្ឆេទថ្ងៃទី២៨ ខែកុម្ភៈ កន្លងទៅ ដែលធ្វើឡើងដោយការិយាល័យស៊ើបការណ៍សម្ងាត់ និងវិភាគ (OIA) នៅក្រសួងសន្តិសុខមាតុភូមិ បាននិយាយថា អ៊ីរ៉ង់ និងក្រុមតំណាងរបស់ខ្លួន «ប្រហែលជា» បង្កការគំរាមកំហែងនៃការវាយប្រហារដាក់គោលដៅលើសហរដ្ឋអាមេរិក ប៉ុន្តែការវាយប្រហារដោយផ្ទាល់ (Physical Attack) ទ្រង់ទ្រាយធំមិនទំនងជាកើតឡើងទេ។

របាយការណ៍នេះបន្ថែមថា ក្នុងរយៈពេលខ្លី ក្តីបារម្ភចម្បងគឺថា «ក្រុមចោរព័ត៌មានវិទ្យាតាមប្រព័ន្ធអ៊ីនធឺណិត» ដែលមានសម្ព័ន្ធភាពជាមួយអ៊ីរ៉ង់ នឹងធ្វើការវាយប្រហារតាមអ៊ីនធឺណិតកម្រិតទាបប្រឆាំងនឹងបណ្តាញរបស់អាមេរិក ដូចជាការបំផ្លាញគេហទំព័រ និងការធ្វើឱ្យប្រព័ន្ធជាប់រវល់រហូតដល់គាំងលែងដំណើរការជាដើម។

របាយការណ៍ពីក្រសួងសន្តិសុខមាតុភូមិនេះក៏និយាយផងដែរថា អ៊ីរ៉ង់ទំនងជានឹងបន្តការវាយប្រហាររបស់ខ្លួនប្រឆាំងនឹងគោលដៅរបស់អាមេរិក និងសម្ព័ន្ធមិត្តនៅមជ្ឈិមបូព៌ា ហើយស្ទើរតែប្រាកដថា អ៊ីរ៉ង់មុខជានឹងស្តីបន្ទោសក្រុមមន្ត្រីរដ្ឋាភិបាលជាន់ខ្ពស់អាមេរិកចំពោះការតវ៉ាណាមួយ ដែលចាប់ផ្តើមដោយសារតែសេចក្តីថ្លែងការណ៍របស់លោក Trump ដែលអំពាវនាវឱ្យមានការផ្លាស់ប្តូររបប៕