មន្ត្រីយោធាសហរដ្ឋអាមេរិក បាននិយាយកាលពីថ្ងៃចន្ទ (២ មីនា) ថា សមាជិកកងទ័ពអាមេរិកចំនួន ២នាក់បន្ថែមទៀត ត្រូវបានសម្លាប់ក្នុងសង្គ្រាមនៅអ៊ីរ៉ង់ ដែលធ្វើឱ្យចំនួនសរុបនៃកងទ័ពដែលបានស្លាប់ រហូតមកដល់ពេលនេះ កើនដល់ ៦ នាក់។

កាលពីថ្ងៃអាទិត្យកន្លងទៅ បញ្ជាការកណ្តាលរបស់សហរដ្ឋអាមេរិក បានរាយការណ៍ថា សមាជិកកងទ័ព ៣ នាក់ត្រូវបានសម្លាប់ និង ៥ នាក់ផ្សេងទៀតបានរងរបួសធ្ងន់។ មន្ត្រីយោធាបាននិយាយថា កងទ័ពទាំងនោះត្រូវបានសម្លាប់ បន្ទាប់ពីការវាយប្រហាររបស់អ៊ីរ៉ង់ លើមូលដ្ឋានទ័ពអាមេរិកក្នុងប្រទេសកូវ៉ែត។

នៅព្រឹកថ្ងៃចន្ទ បញ្ជាការកណ្តាលបានបញ្ជាក់ថា សមាជិកកងទ័ពដែលរងរបួសម្នាក់បានស្លាប់ដោយសាររបួស ហើយបន្ទាប់មក នៅរសៀលថ្ងៃចន្ទ បញ្ជាការកណ្តាលបានបន្តថា មន្ត្រីបានរកឃើញសាកសពកងទ័ព ២ នាក់ ដែលបានបាត់ខ្លួនពីមុន «ចេញពីទីតាំងដែលត្រូវបានវាយប្រហារ ក្នុងអំឡុងពេលនៃការវាយប្រហារដំបូងរបស់អ៊ីរ៉ង់ នៅក្នុងតំបន់»។ សរុបមក ចំនួនជនជាតិអាមេរិកដែលបានស្លាប់ក្នុងរយៈពេល ៣ថ្ងៃដំបូងនៃសង្គ្រាម បានកើនឡើងដល់ ៦ នាក់។

ក្រុមមន្ត្រីរដ្ឋបាលនាពេលថ្មីៗនេះ រួមទាំងលោកប្រធានាធីបតីអាមេរិក Donald Trump ផ្ទាល់បានព្រមានថា អាចរំពឹងថានឹងមានជនរងគ្រោះអាមេរិកបន្ថែមទៀត។ លោកនាយឧត្តមសេនីយ៍ Dan Caine ប្រធានអគ្គសេនាធិការចម្រុះ បាននិយាយជាថ្មីមដ្ងទៀតកាលពីថ្ងៃចន្ទថា លោកបានរំពឹងទុកថា សហរដ្ឋអាមេរិកនឹង «ទទួលរងការបាត់បង់បន្ថែមទៀត»៕