ប្រធានាធិបតីអ៊ុយក្រែន លោក Volodymyr Zelenskyy បានថ្លែងកាលពីថ្ងៃចន្ទ (២ មីនា) ថា កិច្ចចរចាសន្តិភាពជុំថ្មីរវាងអ៊ុយក្រែន និងរុស្ស៊ី សម្របសម្រួលដោយសហរដ្ឋអាមេរិក ដែលបានគ្រោងធ្វើឡើងនៅសប្តាហ៍នេះ មិនត្រូវបានលុបចោលឡើយ បន្ទាប់ពីមានការវាយប្រហារកាន់តែខ្លាំងក្លាកាលពីចុងសប្តាហ៍លើប្រទេសអ៊ីរ៉ង់ ដោយអាមេរិក និងអ៊ីស្រាអែល។

លោក Zelenskyy បាននិយាយថា ទីក្រុងគីវ កំពុងពិចារណាលើទីតាំងថ្មីសម្រាប់កិច្ចចរចា ដែលដំបូងឡើយគ្រោងធ្វើនៅថ្ងៃទី ៥ និងទី ៦ ខែមីនា នៅទីក្រុងអាប៊ូដាប៊ី ដោយក្នុងនោះ ប្រទេសទួរគី ឬស្វីសគឺជាជម្រើសដែលអាចទៅរួច។ លោកបានប្រាប់អ្នកយកព័ត៌មានថា៖ «ដោយសារតែអរិភាពដែលកំពុងបន្ត អ៊ុយក្រែនមិនអាចបញ្ជាក់បានថា ជំនួបនេះនឹងប្រព្រឹត្តទៅនៅទីក្រុងអាប៊ូដាប៊ីនោះទេ ប៉ុន្តែទោះជាយ៉ាងណា ក៏មិនទាន់មានភាគីណាមួយលុបចោលកិច្ចប្រជុំនេះដែរ»។

អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃចន្ទដដែលនេះថា ការបន្តកិច្ចចរចាសន្តិភាពជាមួយអ៊ុយក្រែន គឺស្ថិតនៅក្នុងផលប្រយោជន៍របស់រុស្ស៊ី ហើយថា បំណងរបស់ទីក្រុងមូស្គូ នៅតែជាការឈានដល់ដំណោះស្រាយការទូត ដើម្បីបញ្ចប់សង្គ្រាមដ៏បង្ហូរឈាមរយៈពេល ៤ឆ្នាំមកនេះ។

ប្រធានាធិបតីអាមេរិក លោក Donald Trump បាននិងកំពុងជំរុញទាំងទីក្រុងគីវ និងទីក្រុងមូស្គូ ឱ្យស្វែងរកវិធីបញ្ចប់ជម្លោះ ប៉ុន្តែបើទោះបីជាមានការចរចាជាច្រើនជុំក៏ដោយ ក៏អ៊ុយក្រែន និងរុស្ស៊ីនៅតែមានជំហរខុសគ្នាឆ្ងាយណាស់ ជាពិសេសលើបញ្ហាទឹកដី។ លោក Zelenskyy បានបញ្ជាក់ជាថ្មីកាលពីថ្ងៃចន្ទ នូវការបដិសេធរបស់លោកក្នុងការធ្វើសម្បទានតាមការទាមទាររបស់ទីក្រុងមូស្គូ ដែលតម្រូវឱ្យអ៊ុយក្រែន ដកទ័ពចេញពីទឹកដីតំបន់ Donetsk ភាគខាងកើតដែលនៅសេសសល់ចំនួន ២០% ដែលរុស្ស៊ីមិនទាន់អាចដណ្តើមបាន៕