នាយករដ្ឋមន្ត្រីអ៊ីស្រាអែល លោក Benjamin Netanyahu បានថ្លែងកាលពីថ្ងៃចន្ទ (២ មីនា) ថា សង្គ្រាមរបស់សហរដ្ឋអាមេរិក និងអ៊ីស្រាអែល ប្រឆាំងនឹងអ៊ីរ៉ង់ អាចនឹងប្រើ «ពេលខ្លះ» ប៉ុន្តែនឹងមិនអូសបន្លាយដល់រាប់ឆ្នាំនោះទេ។

សង្គ្រាមផ្លូវអាកាសរបស់អាមេរិក និងអ៊ីស្រាអែលប្រឆាំងនឹងអ៊ីរ៉ង់ បានចាប់ផ្តើមជាមួយនឹងការវាយប្រហារយ៉ាងសន្ធាប់លើទីក្រុងតេអេរ៉ង់ កាលពីថ្ងៃសៅរ៍កន្លងទៅ ដែលបានសម្លាប់មេដឹកនាំកំពូលអ៊ីរ៉ង់ គឺលោក Ali Khamenei និងបង្កឱ្យមានការសងសឹកពីសំណាក់អ៊ីរ៉ង់ទៅលើអ៊ីស្រាអែល រួមទាំងការវាយប្រហារដោយមីស៊ីលលើបណ្តាប្រទេសអារ៉ាប់ ដែលមានមូលដ្ឋានទ័ពអាមេរិក ទូទាំងតំបន់មជ្ឈិមបូព៌ា។

លោកប្រធានាធិបតីអាមេរិក Donald Trump ដំបូងឡើយបានប៉ាន់ស្មានថា សង្គ្រាមនឹងមានរយៈពេលពី ៤ ទៅ ៥ សប្តាហ៍ ប៉ុន្តែលោកបន្ថែមថា ជម្លោះក៏អាចនឹងអូសបន្លាយយូរជាងនេះផងដែរ។ យ៉ាងណាក៏ដោយ លោក Netanyahu បានច្រានចោលនូវគំនិតដែលថា ជម្លោះនេះនឹងអូសបន្លាយរាប់ឆ្នាំ ដូចសង្គ្រាមមុនៗនៅក្នុងតំបន់ ពោលគឺសង្គ្រាមអាមេរិកនៅអ៊ីរ៉ាក់ និងអាហ្វហ្គានីស្ថាន។

លោក Netanyahu បានប្រាប់ទូរទស្សន៍ Fox News ថា៖ «សង្រ្គាមនេះនឹងមានភាពរហ័ស និងម៉ឺងម៉ាត់។ ប្រតិបត្តិការសឹកអាចនឹងចំណាយពេលខ្លះ ប៉ុន្តែនឹងប្រើពេលដល់រាប់ឆ្នាំឡើយ ហើយនេះមិនមែនជាសង្គ្រាមដែលគ្មានទីបញ្ចប់នោះទេ»។ លោក Netanyahu បន្ថែមថា លោកមើលឃើញថា សង្គ្រាមនេះគឺជាឱកាសមួយសម្រាប់សន្តិភាពយូរអង្វែងនៅមជ្ឈិមបូព៌ា រួមទាំងសន្តិភាពរវាងអ៊ីស្រាអែល និងអារ៉ាប៊ីសាអ៊ូឌីតផងដែរ។

យោងតាមការស្ទង់មតិរបស់សារព័ត៌មានរ៉យទ័រ និងស្ថាប័នស្រាវជ្រាវ Ipsos កាលពីចុងសប្តាហ៍មុន បានបង្ហាញថា មានពលរដ្ឋអាមេរិកតែម្នាក់ក្នុងចំណោមបួននាក់ប៉ុណ្ណោះ ដែលគាំទ្រការវាយប្រហាររបស់អាមេរិកលើអ៊ីរ៉ង់ ដែលបានធ្វើឱ្យមជ្ឈិមបូព៌ាធ្លាក់ក្នុងភាពវឹកវរ៕