សហរដ្ឋអាមេរិកកាលពីថ្ងៃចន្ទ បានដាក់ទណ្ឌកម្មលើកងកម្លាំងការពារជាតិប្រទេសរ៉្វាន់ដា (RDF) និងមន្ត្រីជាន់ខ្ពស់ចំនួនបួនរូបរបស់ខ្លួន ដោយលើកឡើងពីការគាំទ្រចំពោះចលនាក្រុមឧទ្ទាមM23 នៅភាគខាងកើតសាធារណរដ្ឋប្រជាធិបតេយ្យកុងហ្គោ (DRC)។

នៅក្នុងសេចក្តីថ្លែងការណ៍ ការិយាល័យគ្រប់គ្រងទ្រព្យសកម្មបរទេស (OFAC) នៃក្រសួងរតនាគារសហរដ្ឋអាមេរិក បាននិយាយថាកងកម្លាំងការពារជាតិប្រទេសរ៉្វាន់ដា (RDF) បាន «គាំទ្រ បណ្តុះបណ្តាល និងរួមប្រយុទ្ធយ៉ាងសកម្ម» ជាមួយក្រុម M23 ដែលកំពុងស្ថិតនៅក្រោមទណ្ឌកម្មរបស់សហរដ្ឋអាមេរិក និងអង្គការសហប្រជាជាតិចំពោះការរំលោភសិទ្ធិមនុស្ស និងវិបត្តិភៀសខ្លួនយ៉ាងច្រើននៅក្នុងប្រទេសកុងហ្គោ។

ក្រសួងរតនាគារសហរដ្ឋអាមេរិក ក៏បានចោទប្រកាន់កងកម្លាំងការពារជាតិប្រទេសរ៉្វាន់ដា (RDF) ពីការដាក់ពង្រាយកងទ័ព និងយុទ្ធោបករណ៍ទៅកាន់ភាគខាងកើតប្រទេសកុងហ្គោ ដែលរួមចំណែកដល់ការទទួលបានទឹកដីរបស់ក្រុមប្រដាប់អាវុធ រួមទាំងការដណ្តើមយកទីក្រុងសំខាន់ៗ និងតំបន់រ៉ែ។

ប្រទេសរ៉្វាន់ដា បានច្រានចោលយ៉ាងឆាប់រហ័សចំពោះការចោទប្រកាន់របស់សហរដ្ឋអាមេរិក ដោយចាត់ទុកទណ្ឌកម្មទាំងនោះថា អយុត្តិធម៌ និងជាឯកតោភាគី។ នៅក្នុងសេចក្តីថ្លែងការណ៍ ដែលចេញផ្សាយកាលពីល្ងាចថ្ងៃចន្ទ ទីក្រុង Kigali បាននិយាយថា វិធានការទាំងនានា «ដែលកំណត់គោលដៅដោយអយុត្តិធម៌លើភាគីតែម្ខាងនៃដំណើរការសន្តិភាព គឺជាការបំភ្លៃការពិត និងបកស្រាយខុសពីការពិតនៃជម្លោះនៅភាគខាងកើតធារណរដ្ឋប្រជាធិបតេយ្យកុងហ្គោ»។