លោក Steve Witkoff ប្រេសិតពិសេសរបស់សហរដ្ឋអាមេរិក សម្រាប់កិច្ចចរចានៅមជ្ឈិមបូព៌ា បាននិយាយកាលពីថ្ងៃចន្ទ (២ មីនា) ថា អ៊ីរ៉ង់បានព្យាយាមប្រើល្បិចគាបសង្កត់យ៉ាងរឹងរូសមកលើគណៈប្រតិភូអាមេរិក ក្នុងអំឡុងពេលកិច្ចចរចានុយក្លេអ៊ែរនាពេលថ្មីៗនេះ ដោយសារតែពួកគេវិនិច្ឆ័យខុសចំពោះក្រុមមន្រ្តីរបស់លោកប្រធានាធិបតី Donald Trump។ 

នៅក្នុងបទសម្ភាសន៍មួយ លោក Witkoff បាននិយាយថា៖ «ជារឿងគួរឱ្យអស់សំណើចណាស់ដែលអ៊ីរ៉ង់ ស្មានថាពួកគេអាចគាបសង្កត់អាមេរិកបាន។ លោក Trump បានបញ្ជូនប្រេសិតទៅចរចា គឺដើម្បីបញ្ជាក់ពីឆន្ទៈធ្វើកិច្ចព្រមព្រៀងរបស់អ៊ីរ៉ង់ ដើម្បីដោះស្រាយគោលដៅរបស់លោកដូចជា៖ ការលុបបំបាត់កម្មវិធីមីស៊ីលអ៊ីរ៉ង់ ការបញ្ឈប់ការគាំទ្រដល់ក្រុមសកម្មប្រយុទ្ធ ការលុបបំបាត់កងទ័ពជើងទឹករបស់អ៊ីរ៉ង់ដើម្បីសេរីភាពតាមដែនសមុទ្រ និងលុបបំបាត់ការគំរាមកំហែងបិទច្រកសមុទ្រ Hormuz ខណៈគោលដៅចុងក្រោយគឺ មិនឱ្យចម្រាញ់សារធាតុនុយក្លេអ៊ែរក្នុងកម្រិតដែលអាចផលិតជាអាវុធបានឡើយ ដែលមានន័យថា មិនអាចមានគ្រាប់បែកនុយក្លេអ៊ែរជាដាច់ខាត»។ 

លោក Witkoff បានបន្ថែមថា៖ «មន្រ្តីអាមេរិក បានព្យាយាមធ្វើកិច្ចព្រមព្រៀងដ៏យុត្តិធម៌មួយជាមួយអ៊ីរ៉ង់ ហើយច្បាស់ណាស់ថា នឹងមិនអាចទៅរួចទេ ប្រហែលជាតាំងពីពេលបិទបញ្ចប់កិច្ចចរចានុយក្លេអ៊ែរជុំទីពីរមកម្ល៉េះ ប៉ុន្តែអាមេរិកនៅតែបន្តទៅកិច្ចប្រជុំលើកទីបី ដើម្បីសាកល្បងជាលើកចុងក្រោយ ប៉ុន្តែមិនមានលទ្ធផលវិជ្ជមានឡើយ»។

ប្រេសិតអាមេរិករូបនេះសង្កត់ធ្ងន់ថា អ៊ីរ៉ង់បានចរចាដោយអះអាងពី «សិទ្ធិដែលមិនអាចរំលោភបំពានបាន» ក្នុងការចម្រាញ់ឥន្ធនៈនុយក្លេអ៊ែរទាំងអស់របស់ខ្លួន ជាជំហរដ៏រឹងរូសមួយធ្វើឱ្យគណៈប្រតិភូអាមេរិកភ្ញាក់ផ្អើលយ៉ាងខ្លាំង និងបង្ហាញឱ្យឃើញច្បាស់ពីការលំបាកក្នុងការឈានទៅរកកិច្ចព្រមព្រៀង៕