អ៊ីស្រាអែលបានធ្វើការវាយប្រហារជាបន្តបន្ទាប់មួយទៀតលើទីក្រុងតេអេរ៉ង់ ដោយកំណត់គោលដៅលើទីស្នាក់ការកណ្តាលរាប់សិបកន្លែងនៃរចនាសម្ព័ន្ធសន្តិសុខផ្សេងៗរបស់អ៊ីរ៉ង់។ នេះបើយោងតាមកងកម្លាំងការពារអ៊ីស្រាអែល (IDF)។

កងកម្លាំងការពារអ៊ីស្រាអែល (IDF) បាននិយាយថា៖«ខ្លួនបានធ្វើការវាយប្រហារជាបន្តបន្ទាប់ប្រឆាំងនឹងមជ្ឈមណ្ឌលបញ្ជាការដែលជាកម្មសិទ្ធិរបស់សន្តិសុខផ្ទៃក្នុង និងក្រសួងស៊ើបការណ៍សម្ងាត់ នៅចំកណ្តាលទីក្រុងតេអេរ៉ង់»។ «ជាផ្នែកមួយនៃការវាយប្រហារនេះ កងទ័ពអាកាសអ៊ីស្រាអែល បានកំណត់គោលដៅលើទីស្នាក់ការកណ្តាល មូលដ្ឋាន និងមជ្ឈមណ្ឌលបញ្ជាការតំបន់នៃស្ថាប័នសន្តិសុខផ្ទៃក្នុងរបស់របប    ភេរវកម្មអ៊ីរ៉ង់»។

យោងតាមIDF ការវាយប្រហារទាំងនោះ ត្រូវបានធ្វើឡើងទៅលើ «ទីស្នាក់ការកណ្តាលជាងដប់កន្លែង

ដែលជាកម្មសិទ្ធិរបស់ក្រសួងស៊ើបការណ៍សម្ងាត់អ៊ីរ៉ង់ ដែលជាស្ថាប័នស៊ើបការណ៍សម្ងាត់សំខាន់របស់របបនេះ និងទីស្នាក់ការកណ្តាលជាច្រើនរបស់កងកម្លាំង Quds»។

កងកម្លាំងការពារអ៊ីស្រាអែល បានបន្ថែមថា៖«លើសពីនេះទៅទៀតនោះ កងទ័ពអាកាសអ៊ីស្រាអែល បានបន្តវាយប្រហារប្រព័ន្ធបាញ់មីស៊ីលពីដីទៅដី ទីតាំងដែលប្រើសម្រាប់ផលិតអាវុធសម្រាប់កងកម្លាំងអ៊ីរ៉ង់ និងទីតាំងកងទ័ពអាកាសផ្សេងទៀតរបស់កងឆ្មាំបដិវត្តន៍ឥស្លាម (IRGC)។  

សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាទ្រង់ទ្រាយធំប្រឆាំងនឹងអ៊ីរ៉ង់ នៅថ្ងៃទី ២៨ ខែកុម្ភៈ។ ទីក្រុងសំខាន់ៗរបស់អ៊ីរ៉ង់ រួមទាំងទីក្រុងតេអេរ៉ង់ ត្រូវបានវាយប្រហារ។ សេតវិមានបានបង្ហាញភាពត្រឹមត្រូវនូវការវាយប្រហារនេះ ដោយលើកឡើងពីការគំរាមកំហែងដោយមីស៊ីល និងនុយក្លេអ៊ែរពីអ៊ីរ៉ង់។ ក្នុងពេលជាមួយគ្នានេះ ថ្នាក់ដឹកនាំអាមេរិក បានអំពាវនាវដោយបើកចំហដល់ប្រជាជនអ៊ីរ៉ង់ឲ្យក្រោកឡើងប្រឆាំងនឹងរដ្ឋាភិបាលរបស់ពួកគេ និងដណ្តើមអំណាច៕