ឯកអគ្គរដ្ឋទូតអ៊ីស្រាអែល ប្រចាំអង្គការសហប្រជាជាតិ បាននិយាយកាលពីថ្ងៃចន្ទ (២ មីនា) ថា អ៊ីស្រាអែល និងសហរដ្ឋអាមេរិក នឹងមិនបញ្ឈប់ប្រតិបត្តិការរបស់ខ្លួនប្រឆាំងនឹងអ៊ីរ៉ង់នោះឡើយ រហូតទាល់តែគោលដៅលុបបំបាត់នុយក្លេអ៊ែរបានសម្រេច ហើយនឹងធ្វើអ្វីៗគ្រប់យ៉ាងដែលចាំបាច់ ដើម្បីធានាថា ទីក្រុងតេអេរ៉ង់ មិនមានសមត្ថភាពនុយក្លេអ៊ែរជាដាច់ខាត។

ថ្លែងទៅកាន់អ្នកយកព័ត៌មានក្នុងទីក្រុងញូវយ៉ក បេសកជនអ៊ីស្រាអែល លោក Danny Danon បាននិយាយថា អ៊ីរ៉ង់កំពុង «វាយបកទាំងអស់សង្ឃឹម» ផ្នែកយោធា ដើម្បីឆ្លើយតបនឹងអ្វីដែលលោកហៅថា ជាការវាយប្រហារដ៏ម៉ឺងម៉ាត់ និងចំគោលដៅរបស់អាមេរិក និងអ៊ីស្រាអែល។ លោកនិយាយទៀតថា លោកជឿជាក់ថា សេរីភាពសម្រាប់ប្រជាជនអ៊ីរ៉ង់ «នឹងមកដល់ក្នុងពេលឆាប់ៗខាងមុខនេះ»។ 

នៅពេលត្រូវបានសាកសួរថា តើទីតាំងនុយក្លេអ៊ែររបស់អ៊ីរ៉ង់ ស្ថិតក្នុងចំណោមគោលដៅវាយប្រហារដែរឬទេ លោកឆ្លើយថា៖ «គោលដៅមួយនៃប្រតិបត្តិការរួមគ្នានេះ គឺដើម្បីធានាថា អ៊ីរ៉ង់មិនមានសមត្ថភាពនុយក្លេអ៊ែរ ដើម្បីគំរាមកំហែងដល់ពិភពលោកទាំងមូលឡើយ... អ៊ីស្រាអែលនឹងធ្វើអ្វីៗគ្រប់យ៉ាងដែលចាំបាច់ដើម្បីធានាថា អ៊ីរ៉ង់មិនមានសមត្ថភាពនុយក្លេអ៊ែរបែបនោះ»។

ប្រធានាធិបតីអាមេរិក លោក Donald Trump បានថ្លែងកាលពីថ្ងៃចន្ទដដែលនេះ លោកបញ្ជាឱ្យវាយប្រហារអ៊ីរ៉ង់ ដើម្បីរារាំងការអភិវឌ្ឍនុយក្លេអ៊ែរ និងកម្មវិធីមីស៊ីលបាលីស្ទិករបស់ទីក្រុងតេអេរ៉ង់។ យ៉ាងណាមិញ ទីភ្នាក់ងារឃ្លាំមើលអាតូមិក IAEA របស់អង្គការសហប្រជាជាតិ បានឱ្យដឹងកាលពីថ្ងៃចន្ទថា ខ្លួនមិនទាន់ឃើញសញ្ញាណាមួយដែលថា មូលដ្ឋាននុយក្លេអ៊ែររបស់អ៊ីរ៉ង់ រងការខូចខាតក្នុងការវាយប្រហារយោធានាពេលថ្មីៗនេះទេ បើទោះបីជាឯកអគ្គរដ្ឋទូតអ៊ីរ៉ង់ប្រចាំទីភ្នាក់ងារនេះ បានលើកឡើងថា ទីតាំងចម្រាញ់អ៊ុយរ៉ានីញ៉ូម Natanz ត្រូវបានកំណត់ជាគោលដៅវាយប្រហារក៏ដោយ៕