យោងតាមមន្ត្រីជាន់ខ្ពស់សេតវិមាន ២រូប និងសមាជិកគណបក្សសាធារណរដ្ឋម្នាក់ ដែលស្និទ្ធនឹងរដ្ឋបាល បានឲ្យដឹងថា លោកប្រធានាធិបតីអាមេរិក Donald Trump បានបន្តវាយប្រហារយោធា ប្រឆាំងនឹងអ៊ីរ៉ង់ ទោះបីជាមានការព្រមានឯកជនពីជំនួយការជាន់ខ្ពស់ក៏ដោយ ដោយអ្នកទាំងនោះលើកឡើងថា ការកើនឡើងនូវភាពតានតឹងនេះ អាចពិបាកទប់ស្កាត់ ហើយបង្កជាហានិភ័យផ្នែកនយោបាយ សម្រាប់គណបក្សសាធារណរដ្ឋ នៅក្នុងការបោះឆ្នោតពាក់កណ្តាលអាណត្តិខែវិច្ឆិកា។ 

ការវាយប្រហារទ្រង់ទ្រាយធំនេះ ទទួលបានការសរសើរស្ទើរតែឯកច្ឆន្ទពីអ្នកមានជំហរនយោបាយការបរទេសរឹងត្អឹង នៅទីក្រុងវ៉ាស៊ីនតោន ដែលបានគោលបំណងជាយូរមកហើយ ក្នុងការផ្តួលរំលំរបបនៅទីក្រុងតេអេរ៉ង់។ ប៉ុន្តែមន្ត្រីសេតវិមានមួយចំនួន បារម្ភថា ការលេងល្បែងគោលនយោបាយការបរទេសអាចធ្វើឲ្យខូចឱកាសរបស់គណបក្សសាធារណរដ្ឋ ក្នុងការបន្តការគ្រប់គ្រងនៅសភា នៅពេលដែលអ្នកបោះឆ្នោតដែលប្រយ័ត្នប្រយែងចំពោះសង្គ្រាម មានកង្វល់តែអំពីការចំណាយនៃការរស់នៅ ច្រើនជាងជម្លោះនៅបរទេស។

កាលពីថ្ងៃអាទិត្យចុងសប្ដាហ៍កន្លងមក ការស្ទង់មតិរបស់ស្ថាប័ន Reuters/Ipsos បានបង្ហាញថា មានតែជនជាតិអាមេរិកម្នាក់ប៉ុណ្ណោះ ក្នុងចំណោម ៤នាក់ ដែលយល់ស្របនឹងការវាយប្រហាររបស់សហរដ្ឋអាមេរិកដែលបានសម្លាប់មេដឹកនាំអ៊ីរ៉ង់។ ប្រហែលពាក់កណ្តាលនៃអ្នកឆ្លើយតប រួមទាំងម្នាក់ ក្នុងចំណោម ៤នាក់នៃក្រុមសាធារណរដ្ឋ បាននិយាយថា ពួកគេជឿថា លោក Trump មានឆន្ទៈខ្លាំងពេក ក្នុងការប្រើប្រាស់កម្លាំងយោធា។ 

អ្នកយុទ្ធសាស្ត្រក្រុមសាធារណរដ្ឋ លោក Rob Godfrey បាននិយាយថា៖ «ការតភ្ជាប់គ្នា រវាងសុន្ទរកថាប្រចាំឆ្នាំដ៏ជោគជ័យដែលផ្តោតលើលទ្ធភាពនៃការចំណាយ និងបញ្ហាសេដ្ឋកិច្ចដែលជាកង្វល់ចម្បងរបស់អ្នកបោះឆ្នោត ហើយបន្ទាប់មកការធ្វើសង្គ្រាមនៅតំបន់មជ្ឈិមបូព៌ាប៉ុន្មានថ្ងៃក្រោយ មិនមែនគ្រាន់តែបង្កជាការភ្ញាក់ផ្អើលភា្លមៗនោះទេ តែវាថែមទាំងធ្វើឲ្យមនុស្សវង្វែងវង្វាន់ទៀតផង»។  

យ៉ាងណាក្ដី មន្ត្រីទាំងនោះគ្មានមន្ត្រីណាម្នាក់ រំពឹងថា នឹងមានផលវិបាកនយោបាយភ្លាមៗនោះឡើយ។ ផ្ទុយទៅវិញ ពួកគេរំពឹងថា នឹងមានអ្វីដែលមន្ត្រីម្នាក់ពិពណ៌នាថា ជា «ផលប៉ះពាល់យឺតៗ» ដែលបណ្តាលមកពីរយៈពេលនៃជម្លោះ វិសាលភាពនៃការសងសឹក ចំនួនអ្នកស្លាប់ និងរបួសរបស់អាមេរិក ហើយនិងផលប៉ះពាល់លើតម្លៃប្រេងឥន្ធនៈ៕