រដ្ឋមន្ត្រីការបរទេស លោក Marco Rubio បាននិយាយថា យោធាអាមេរិក នឹងបង្កើនការវាយប្រហាររបស់ខ្លួន ប្រឆាំងនឹងអ៊ីរ៉ង់ ដែលជាការព្រមានយ៉ាងច្បាស់ៗ បន្ទាប់ពីមានការវាយប្រហាររយៈពេល ២ថ្ងៃ នៅទូទាំងប្រទេសនេះ ដែលរដ្ឋបាលរបស់លោកប្រធានាធិបតី Donald Trump បានឲ្យដឹងថា បានកម្ចាត់ថ្នាក់ដឹកនាំ ហើយកំណត់គោលដៅកម្មវិធីមីស៊ីលបាលីស្ទិករបស់ទីក្រុងតេអេរ៉ង់។

លោក Rubio បានប្រាប់អ្នកសារព័ត៌មាន នៅវិមាន Capitol Hill ថា៖ «ខ្ញុំមិននឹងផ្តល់ព័ត៌មានលម្អិតនៃកិច្ចប្រឹងប្រែងយុទ្ធសាស្ត្ររបស់យើងទេ ប៉ុន្តែការវាយប្រហារដ៏ធ្ងន់ធ្ងរបំផុតនៅមិនទាន់ធ្វើឡើងដោយយោធាអាមេរិកនោះទេ។ ដំណាក់កាលបន្ទាប់នឹងកាន់តែធ្វើឲ្យអ៊ីរ៉ង់ខូចខាតខ្លាំងជាងពេលនេះ»។

លោក Rubio បានបង្ហាញខ្លួននៅវិមាន Capitol Hill នេះ ដើម្បីរាយការណ៍ដល់សមាជិកសភា អំពីយុទ្ធនាការរបស់លោក Trump រួមជាមួយអ៊ីស្រាអែល ដើម្បីកំណត់គោលដៅអ៊ីរ៉ង់។ លោកបានផ្តល់ភាពច្បាស់លាស់បន្ថែមទៀត ពាក់ព័ន្ធនឹងគោលបំណងរបស់សហរដ្ឋអាមេរិក ដោយនិយាយថា ការផ្តោតជាសំខាន់ គឺដើម្បីបំផ្លាញកម្មវិធីមីស៊ីលបាលីស្ទិក ដែលលោកបានអះអាងថា កំពុងត្រូវបានប្រើជាខែល ដើម្បីជំរុញមហិច្ឆតានុយក្លេអ៊ែររបស់ខ្លួន ក៏ដូចជាកងនាវាចរ និងយានដ្រូនវាយប្រហាររបស់ប្រទេសនេះផងដែរ។

ជាមួយគ្នានេះ លោក Rubio បានបញ្ជាក់ឡើងវិញទៅកាន់អ្នកសារព័ត៌មាន អំពីការអះអាងរបស់លោក Trump ដែលថា អ៊ីរ៉ង់បានបង្កជា «ការគំរាមកំហែងយ៉ាងឆាប់រហ័ស» ដល់សហរដ្ឋអាមេរិក ហើយមេដឹកនាំអាមេរិក មិនត្រូវការការអនុញ្ញាតពីសភា ដើម្បីចាប់ផ្តើមយុទ្ធនាការនេះនោះទេ។ 

លើសពីនោះទៀត លោក Rubio បានបដិសេធថា ការផ្លាស់ប្តូររបបមិនមែនជាគោលដៅនោះទេ ទោះបីជាការវាយប្រហារ រវាងសហរដ្ឋអាមេរិក និងអ៊ីស្រាអែល បានសម្លាប់មេដឹកនាំកំពូល លោក Ayatollah Ali Khamenei និងមេដឹកនាំជាន់ខ្ពស់រាប់សិបនាក់ផ្សេងទៀតក៏ដោយ។ ហើយលោកបានបញ្ជាក់ថា បច្ចុប្បន្នមិនមានការផ្លាស់ប្តូរការទូតកើតឡើងជាមួយអ៊ីរ៉ង់ឡើយ៕