ក្រុមអ្នកវិភាគនៅអាស៊ី បានព្រមានថា ការបង្វែរនាវា និងមីស៊ីលរបស់ទីក្រុងវ៉ាស៊ីនតោនចេញពីការទប់ទល់ជាមួយចិន អាចនឹងបន្សល់ចន្លោះប្រហោងនៅក្នុងការការពារតំបន់របស់ពួកគេ ។

សម្ព័ន្ធមិត្តដែលពួ្រយបារម្ភបំផុតគឺនៅជប៉ុន និងកូរ៉េខាងត្បូង ជាទីដែលមានមូលដ្ឋានទ័ពធំៗរបស់យោធាសហរដ្ឋអាមេរិកជួយទប់ទល់នឹងការដំឡើងសាច់ដុំយោធារបស់ចិន និងប្រទេសប្រដាប់អាវុធនុយក្លេអ៊ែរកូរ៉េខាងជើង ហើយនិងកោះតៃវ៉ាន់ គឺជាកោះគ្រប់គ្រងបែបប្រជាធិបតេយ្យដែលត្រូវបានចិនប្រកាសថាជាកោះផ្តាច់ខ្លួនរបស់ពួកគេ និងបំពាក់អាវុធដោយសហរដ្ឋអាមេរិក ។

លោក Chen Kuan-ting គឹជាតំណាងរាស្រ្តមួយរូបរបស់អាជ្ញាធរកោះតៃវ៉ាន់ ទទួលបន្ទុកកិច្ចការបរទេសរបស់សភា និងនៅគណៈកម្មការការពារជាតិ និយាយប្រាប់ទីភ្នាក់ងារព័ត៌មានរ៉យទ័រថា ពួកយើងសង្ឃឹមថា ប្រតិបត្តិការនេះ ឆាប់បញ្ចប់ និងមានដែនកំណត់ ហើយធនធានអាចនឹងផ្លាស់ត្រឡប់មកកាន់អាស៊ីភ្លាមៗវិញ ។

លោក Chen និយាយថា ជម្លោះរយៈពេលយូរ អាចនឹងធ្វើឲ្យប៉ះពាល់ដល់ស្ថិរភាព និងសន្តិភាពនៅតំបន់ឥណ្ឌូ-ប៉ាស៊ីហ្វិក ហើយទីក្រុងតៃប៉ិ ត្រូវតែត្រៀមខ្លួនសម្រាប់ទីក្រុងប៉េកាំងបង្កើនការបង្ខិតបង្ខំ ស្របពេលដែលសហរដ្ឋអាមេរិកជាប់ដៃរវល់ធ្វើសង្រ្គាម ។

លោក Trump និយាយថា ប្រតិបត្តិការសហរដ្ឋអាមេរិកនៅតំបន់មជ្ឈិមបូព៌ា នឹងមានរយៈពេល ៤-៥សប្តាហ៍ ប៉ុន្តែអាចនឹងបន្តយូរជាងនេះ ។ លោកគ្រោងនឹងធ្វើដំណើរទៅកាន់ប្រទេសចិន ដើម្បីជួបជាមួយប្រធានាធិបតីចិនលោក Xi Jinping នាដំណាច់ខែនេះ បើទោះបីជាទីក្រុងប៉េកាំង នៅពុំទាន់បានបញ្ជាក់ដំណើរទស្សនកិច្ចនេះក៏ដោយ ។

ក្រៅពីការផ្លាស់ប្តូរការផ្តោតសំខាន់ផ្នែកនយោបាយសហរដ្ឋអាមេរិកចេញពីអាស៊ី ក្រុមមន្រ្តី និងក្រុមអ្នកជំនាញយោធា និយាយថា ជម្លោះរយៈពេលយូរនៅតំបន់មជ្ឈិមបូព៌ា អាចដកកងកម្លាំងជើងទឹកសហរដ្ឋអាមេរិកចេញពីតំបន់នេះ និងធ្វើឲ្យអស់គ្រាប់រំសេវដែលសម្ព័ន្ធមិត្តអាស៊ីពឹងផ្អែក ។

ខណៈពេលនោះដែរ នាវាផ្ទុកយន្តហោះចម្បាំងសហរដ្ឋអាមេរិកមួយគ្រឿងគត់ដែលដាក់ពង្រាយនៅអាស៊ី គឺនាវា USS George Washington បច្ចុប្បន្នកំពុងថែទាំនៅមូលដ្ឋានទ័ពរបស់ពួកគេ ស្ថិតក្នុងទីក្រុង Yokosuka ប្រទេសជប៉ុន ៕