លោកប្រធានាធិបតី Volodymyr Zelensky បានលើកឡើងថា សង្គ្រាមអូសបន្លាយ នៅតំបន់មជ្ឈិមបូព៌ា អាចកាត់បន្ថយលទ្ធភាពទទួលបានប្រព័ន្ធការពារដែនអាកាស សម្រាប់ប្រទេសអ៊ុយក្រែន ដោយទទួលស្គាល់ពីផលប៉ះពាល់ដែលអាចកើតមានពីយុទ្ធនាការទម្លាក់គ្រាប់បែកដឹកនាំដោយសហរដ្ឋអាមេរិក នៅក្នុងប្រទេសអ៊ីរ៉ង់។

ទីក្រុងវ៉ាស៊ីនតោន ស្ទើរតែបញ្ឈប់ផ្តល់ជំនួយយោធាដល់ទីក្រុងគីវ ចាប់តាំងពីប្រធានាធិបតី លោក Donald Trump បានវិលត្រឡប់ទៅគ្រប់គ្រងសេតវិមានវិញ នៅឆ្នាំ២០២៥ ប៉ុន្តែសហរដ្ឋអាមេរិកនៅតែបន្តលក់អាវុធដែលផ្តល់ហិរញ្ញប្បទានដោយសម្ព័ន្ធមិត្តរបស់អ៊ុយក្រែន ភាគច្រើនពីអឺរ៉ុប។

លោក Zelensky បាននិយាយថា លោកបានពិភាក្សាអំពីជំនួយយោធាជាមួយអធិការបតីអាល្លឺម៉ង់ លោក Friedrich Merz កាលពីព្រឹកថ្ងៃចន្ទ (ទី២ ខែមីនា ឆ្នាំ២០២៦) ហើយនឹងពិភាក្សាបញ្ហានេះ ជាមួយរដ្ឋធានីផ្សេងទៀត។ លោកបានបញ្ជាក់ថា ជំនួយពីសម្ព័ន្ធមិត្តកំពុងដំណើរការដូចធម្មតា សម្រាប់ពេលនេះ។

នៅក្នុងចម្លើយថតទុកដែលត្រូវបានបង្ហោះនៅលើកម្មវិធីជជែកតាម Whatsapp ជាមួយអ្នកសារព័ត៌មាន នៅថ្ងៃទី២ ខែមីនានោះ លោក Zelensky បានលើកឡើងថា៖ «ការដឹកជញ្ជូនការផ្គត់ផ្គង់ដែលយើងពឹងផ្អែកលើ មិនបានធ្លាក់ចុះនោះទេ។ តែយ៉ាងណាក្ដី ប្រសិនបើប្រតិបត្តិការយោធា នៅមជ្ឈិមបូព៌ា ត្រូវបានអូសបន្លាយនោះ វានឹងជះឥទ្ធិពលដល់ការផ្គត់ផ្គង់យ៉ាងប្រាកដ»។

គួរបញ្ជាក់ថា ការវាយប្រហារលើអ៊ីរ៉ង់ បានកើតឡើងនៅក្នុងពេលវេលាដ៏លំបាកមួយ សម្រាប់ការចរចា ដើម្បីបញ្ចប់ការឈ្លានពានរយៈពេល ៤ឆ្នាំរបស់រុស្ស៊ី ខណៈដែលគណៈប្រតិភូ សម្រាប់ការចរចាសន្តិភាពដែលសម្របសម្រួលដោយសហរដ្ឋអាមេរិ កត្រូវបានកំណត់ឲ្យជួបគ្នា នៅទីក្រុង Abu Dhabi ប្រទេសអេមីរ៉ាតអារ៉ាប់រួម សម្រាប់ការចរចាត្រីភាគីជុំមួយទៀត៕