អ្នកជំនាញជប៉ុនខាងឧស្ម័នធម្មជាតិរាវ(LNG)និយាយនៅថ្ងៃអង្គារនេះថា វិបត្តិឧស្ម័ន LNG នឹងធ្លាក់ចូលទៅក្នុងយុគសម័យមិនធ្លាប់មានពីមុនមក ស្របពេលដែលជម្លោះសហរដ្ឋអាមេរិក-អ៊ីរ៉ង់ កាន់តែតានតឹងខ្លាំង ក្រោយទីក្រុងតេអេរ៉ង់ មានគោលដៅវាយប្រហារនាវាឆ្លងកាត់ច្រកសមុទ្រ Hormuz ។

អ៊ីរ៉ង់បានប្រកាសថា ច្រកសមុទ្រ Hormuz ត្រូវបានបិទ កាលពីថ្ងៃចន្ទ ហើយពួកគេបានគំរាមវាយប្រហារនាវាណាមួយ ដែលព្យាយាមឆ្លងកាត់ចំណុចបិទខ្ទប់ជាយុទ្ធសាស្ត្រមួយនេះ ខណៈដែលយោធាអាមេរិក បានឲ្យដឹងថា សមាជិកយោធាអាមេរិកចំនួន ៦នាក់ បានបាត់បង់ជីវិត អំឡុងជម្លោះដែលកំពុងកើនឡើងជាមួយអ៊ីរ៉ង់ ។

លោក Go Katayama គឺជាអ្នកវិភាគទស្សនទានចម្បងនៅក្រុមហ៊ុន Kepler និយាយប្រាប់ទីភ្នាក់ងារព័ត៌មានរ៉យទ័រថា ច្រកសមុទ្រ Hormuz ដែលរួមបញ្ជូលការផ្គត់ផ្គង់ពីកាតា និងអារ៉ាប់រួម ស្មើនឹងប្រហែល ២០ភាគរយនៃការផ្គត់ផ្គង់ឧស្ម័ន LNG សកល ។ ពួកយើងកំពុងខិតជិតចូលក្នុងយុគសម័យមិនធ្លាប់មានពីមុនមក យុគសម័យធំជាងការយល់ឃើញរបស់លោក ធំជាងអ្វីដែលពួកយើងបានមើលឃើញនៅក្នុងវិបត្តិអ៊ុយក្រែន-រុស្ស៊ី ។

យោងតាមការអះអាងរបស់អ្នកវិភាគរូបនេះ បានឲ្យដឹងថា នៅក្នុងសេណារីយ៉ូ ជាទីដែលការផ្អាកច្រកដឹកទំនិញនឹងបន្តរហូតដល់រយៈពេល ១ឆ្នាំ នឹងមានការបំផ្លិចបំផ្លាញតម្រូវការ ជាពិសេសធ្វើឲ្យប៉ះពាល់ដល់ប្រទេសជាច្រើនដូចជាប្រទេសប៉ាគីស្ថាន ដែលទួលបានឧស្ម័ន LNG ប្រហែល ៩៩ភាគរយពីកាតា ។

លោកបន្តថា ប្រទេសកំពុងអភិវឌ្ឍនៅអាស៊ី នឹងចាប់ផ្តើមងាកមកប្រើប្រាស់ប្រេងជំនួសវិញ សម្រាប់ថាមពល ។ ប្រទេសនៅអាស៊ីរួមទាំងជប៉ុន ត្រូវប្រកួតប្រជែងគ្នាដណ្តើមទំនិញមិនមែនជារបស់កាតា និងអារ៉ាប់រួម ដែលជាទំនិញមកពីសហរដ្ឋអាមេរិក អូស្រ្តាលី ឬទំនិញអាត្លង់ទិកមកពីអាហ្វ្រិកខាងលិច ៕