ជនជាតិម៉ាឡេស៊ីម្នាក់ និងជនជាតិហ្វីលីពីនម្នាក់ បានស្លាប់នៅថ្ងៃអង្គារនេះ ពេលឧទ្ធម្ភាគចក្រមួយគ្រឿង បានធ្លាក់នៅលើដីឡូតិ៍ទំនេរចោលមួយកន្លែង ស្ថិតនៅភាគអាគ្នេយទីក្រុងម៉ានីល ប្រទេសហ្វីលីពីន ។

ក្រុមមន្រ្តីនិយាយថា ឧទ្ធម្ភាគចក្រមួយគ្រឿងនេះ ដឹកមនុស្ស ៥នាក់ រួមទាំងជនជាតិម៉ាឡេស៊ី ២នាក់ ពេលដែលធ្លាក់នៅលើដីមានស្មៅ ស្ថិតក្នុងទីក្រុង Pililla ខេត្ត Rizal កាលពីវេលាម៉ោង ៧ និង ២៧នាទីព្រឹក ម៉ោងក្នុងស្រុក ថ្ងៃអង្គារនេះ ។

លោក Ramjae Pangga គឺជាមន្រ្តីនគរបាលខេត្ត Rizal និយាយប្រាប់ទីភ្នាក់ងារព័ត៌មាន AFPថា អ្នកដំណើរ ២នាក់ ដែលជាជនជាតិម៉ាឡេស៊ីម្នាក់ និងជនជាតិហ្វីលីពីនម្នាក់ ត្រូវបានសម្លាប់នៅក្នុងឧបទ្ទេវហេតុធ្លាក់ឧទ្ធម្ភាគចក្រនេះ ។

លោក Pangga បន្តថា ការចុះចតបន្ទាន់ត្រូវបានបង្ខំចិត្ត ដោយសារម៉ាស៊ីនឧទ្ធម្ភាគចក្រ ប្រុងនឹងរលត់ ។

លោក John Masinsin គឺជាអភិបាលក្រុង Pililla និយាយថា ខណៈពេលនោះដែរ អ្នកបើកបរឧទ្ធម្ភាគចក្រ បានរងរបួសធ្ងន់ ។ អ្នករស់រានទាំង ៣ កំពុងស្ថិតក្នុងស្ថានភាពតក់ស្លុត ជាពិសេសអ្នកបើកបរ ។ បច្ចុប្បន្នពួកគេកំពុងស្ថិតនៅតាមផ្លូវទៅកាន់មន្ទីរពេទ្យក្រុងម៉ានីល យោងតាមសំណើរបស់គ្រួសារពួកគេ ។

ការស៊ើបអង្កេតកំពុងធ្វើឡើងដោយអាជ្ញាធរអាកាសចរណ៍ស៊ីវិលហ្វីលីពីន ដើម្បីកំណត់ពីមូលហេតុពិតប្រាកដនៅពីក្រោយហេតុការណ៍ធ្លាក់ឧទ្ធម្ភាគចក្រមួយគ្រឿងនេះ ៕