ការវាយប្រហាររបស់សហរដ្ឋអាមេរិក និងអ៊ីស្រាអែល នៅតែបន្តដាក់គោលដៅនានានៅទូទាំងទីក្រុងតេអេរ៉ង់ កាលពីថ្ងៃអង្គារ ៣ មីនាសប្ដាហ៍នេះ ខណៈប្រធានាធិបតីអាមេរិកលោក Donald Trump បានព្រមានថាវា "យឺតពេលហើយ" សម្រាប់អ៊ីរ៉ង់ក្នុងការស្វែងរកការចរចាដើម្បីគេចចេញពីសង្គ្រាមដែលឥឡូវនេះកំពុងចូលដល់ថ្ងៃទីប្រាំ។   

យានដ្រូន និងមីស៊ីល បានធ្លាក់ចំទីតាំងផលិតប្រេង និងបេសកកម្មការទូតរបស់សអាមេរិកនៅឈូងសមុទ្រ ខណៈសាធារណរដ្ឋអ៊ីស្លាមបានសងសឹក ហើយអ៊ីស្រាអែលបានរុញកងទ័ពឱ្យចូលកាន់តែជ្រៅទៅក្នុងប្រទេសលីបង់ ដើម្បីប្រយុទ្ធប្រឆាំងនឹងកងជីវពល ហេសបូឡា(Hezbollah) ដែលគាំទ្រដោយទីក្រុងតេអេរ៉ង់ បន្ទាប់ពីពួកគេបានចូលរួមក្នុងការប្រយុទ្ធនេះ។

អ៊ីស្រាអែលបានប្រកាសពី "រលកធំ" នៃការវាយប្រហារដែលផ្តោតលើរដ្ឋធានីរបស់អ៊ីរ៉ង់កាលពីថ្ងៃអង្គារ ដោយប្រព័ន្ធផ្សព្វផ្សាយក្នុងស្រុកបង្ហាញពីផ្សែងហុយឡើងពីលើកណ្តាលទីក្រុង ជាទីតាំងនៃអគាររដ្ឋាភិបាលជាច្រើន និងរាយការណ៍ពីការវាយប្រហារលើអាកាសយានដ្ឋានមួយក្នុងចំណោមអាកាសយានដ្ឋានពីររបស់ទីក្រុងនេះ រួមទាំងការិយាល័យប្រធានាធិបតីផងដែរ ខណៈចំនួនមនុស្សស្លាប់សរុបនៅអ៊ីរ៉ង់កើនឡើងដល់ ៧៨៧នាក់។

លោក Trump បានបង្ហោះនៅលើប្រព័ន្ធផ្សព្វផ្សាយសង្គមថា ប្រព័ន្ធការពារដែនអាកាស កងទ័ពអាកាស កងទ័ពជើងទឹក និងថ្នាក់ដឹកនាំរបស់ពួកគេបានបាត់ទៅហើយ។ ពួកគេចង់ចរចា តែលោកថា "យឺតពេលហើយ" ពីរថ្ងៃបន្ទាប់ពីលោកបាននិយាយថាលោកបើកចំហសម្រាប់ការចរចា និងបួនថ្ងៃបន្ទាប់ពីការវាយប្រហាររបស់សហរដ្ឋអាមេរិក និងអ៊ីស្រាអែល បានសម្លាប់មេដឹកនាំកំពូលអ៊ីរ៉ង់លោក Ayatollah Ali Khamenei។

ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិនៅទីក្រុងហ្សឺណែវបានបដិសេធថាប្រទេសរបស់លោកមិនបានទាក់ទងសហរដ្ឋអាមេរិកសម្រាប់ការចរចានោះទេ។ យោងតាមប្រព័ន្ធផ្សព្វផ្សាយអ៊ីរ៉ង់ ការវាយប្រហាររបស់សហរដ្ឋអាមេរិក និងអ៊ីស្រាអែល បានកំណត់គោលដៅអគារមួយកាលពីអង្គារនៅទីក្រុង Qom ជាកម្មសិទ្ធិរបស់គណៈកម្មាធិការក្នុងការជ្រើសរើសមេដឹកនាំកំពូលថ្មី៕