អ៊ីស្រាអែលបាននិយាយកាលពីថ្ងៃអង្គារ ៣មីនាសប្ដាហ៍នេះថា ខ្លួនបានពង្រីកប្រតិបត្តិការជើងគោករបស់ខ្លួននៅភាគខាងត្បូងលីបង់ ហើយកំពុងបង្កើតតំបន់ទ្រនាប់មួយតាមបណ្តោយព្រំដែន ខណៈ ការប្រយុទ្ធជាមួយហេសបូឡាកាន់តែខ្លាំង ស្របពេលមានជម្លោះក្នុងតំបន់កាន់តែរាលដាល។

យោធាអ៊ីស្រាអែលបាននិយាយថា កងទ័ពបានរុលទៅមុខហួសពីទីតាំងចំនួនប្រាំដែលមានស្រាប់នៅក្នុងទឹកដីលីបង់។

សកម្មភាពនេះបានកើតឡើងបន្ទាប់ពីការអនុញ្ញាតពីរដ្ឋមន្ត្រីក្រសួងការពារជាតិអ៊ីស្រាអែល លោក Israel Katz ឲ្យដណ្តើមយកដីបន្ថែមក្នុងគោលបំណងការពារសហគមន៍អ៊ីស្រាអែលភាគខាងជើងពីការវាយប្រហារដោយគ្រាប់រ៉ូកែត និងយានដ្រូន។

របាយការណ៍បាននិយាយថា ដើម្បីទប់ស្កាត់លទ្ធភាពនៃការបាញ់ប្រហារដោយផ្ទាល់ទៅលើសហគមន៍អ៊ីស្រាអែល នាយករដ្ឋមន្ត្រី លោក ប៊ែនចាមីន ណេតាន់យ៉ាហ៊ូ និងរូបលោកបានអនុញ្ញាតឱ្យកងកម្លាំង IDF រុលទៅមុខ និងកាន់កាប់ដែនដី បន្ថែមនៅលីបង់ និងការពារសហគមន៍ព្រំដែន។

ពេញមួយយប់ និងរហូតដល់ព្រឹកថ្ងៃអង្គារ កងទ័ពអាកាសអ៊ីស្រាអែលបានអនុវត្តអ្វីដែលយោធាហៅថាជារលកនៃការវាយប្រហារយ៉ាងទូលំទូលាយ ប្រឆាំងនឹងហេដ្ឋារចនាសម្ព័ន្ធហេសបូឡានៅបេរូត និងភាគខាងត្បូងលីបង់។

អាជ្ញាធរលីបង់បាននិយាយថា មនុស្ស៥២ នាក់ត្រូវបានសម្លាប់ និង១៥៤នាក់រងរបួសក្នុងការវាយប្រហាររបស់អ៊ីស្រាអែលចាប់តាំងពីការកើនឡើងកាន់តែខ្លាំងនៃជម្លោះ។ តួលេខទាំងនេះមិនអាចផ្ទៀងផ្ទាត់ដោយឯករាជ្យបានទេ៕