កាលពីថ្ងៃអង្គារ (៣ មីនា) ឯកអគ្គរដ្ឋទូតអ៊ីរ៉ង់ ប្រចាំអង្គការសហប្រជាជាតិ នៅទីក្រុងហ្សឺណែវ បានច្រានចោលការចរចាសន្តិភាពណាមួយជាមួយសហរដ្ឋអាមេរិក នាពេលបច្ចុប្បន្ននេះ ខណៈជម្លោះបានបន្តអស់ជាច្រើនថ្ងៃ បន្ទាប់ពីសហរដ្ឋអាមេរិក និងអ៊ីស្រាអែល បានបើកការវាយប្រហាររួមគ្នាលើអ៊ីរ៉ង់។

សំឡេងផ្ទុះបានអង្រួនទីក្រុងតេអេរ៉ង់ ជាថ្មីម្តងទៀតកាលពីថ្ងៃអង្គារ ហើយទីផ្សារហិរញ្ញវត្ថុជុំវិញពិភពលោក បានធ្លាក់ចុះ ស្របពេលក្ដីបារម្ភពីភាពរអាក់រអួលដ៏អូសបន្លាយនៃការផ្គត់ផ្គង់ថាមពលសកល។ ប្រធានាធិបតីអាមេរិក លោក Donald Trump និងនាយករដ្ឋមន្ត្រីអ៊ីស្រាអែល លោក Benjamin Netanyahu ក៏បានផ្តល់ចម្លើយបែបមិនច្បាស់លាស់ នៅពេលត្រូវសាកសួរថា តើសង្គ្រាមនេះអាចអូសបន្លាយពេលយូរប៉ុនណា។

លោក Ali Bahreini ឯកអគ្គរដ្ឋទូតនៃបេសកកម្មអ៊ីរ៉ង់ ប្រចាំ UN នៅទីក្រុងហ្សឺណែវ បានប្រាប់អ្នកយកព័ត៌មានថា អ៊ីរ៉ង់មិនបានទាក់ទងអាមេរិក ដោយផ្ទាល់ឬដោយប្រយោល អំពីការរៀបចំកិច្ចពិភាក្សាដើម្បីកាត់បន្ថយជម្លោះ ឬអំពីការបន្តកិច្ចចរចាលើកម្មវិធីនុយក្លេអ៊ែររបស់ទីក្រុងតេអេរ៉ង់នោះឡើយ។

នៅពេលត្រូវសាកសួរពីលទ្ធភាពនៃកិច្ចពិភាក្សាណាមួយ លោក Bahreini បាននិយាយថា៖ «សម្រាប់ពេលនេះ អ៊ីរ៉ង់មានការសង្ស័យយ៉ាងខ្លាំងអំពីអត្ថប្រយោជន៍នៃការចរចា... ភាសាតែមួយគត់សម្រាប់និយាយជាមួយអាមេរិក គឺភាសានៃការការពារខ្លួន»។ លោកបានបន្ថែមថា៖ «ពេលនេះមិនមែនជាពេលសម្រាប់កិច្ចចរចាប្រភេទណាមួយពីខាងអ៊ីរ៉ង់នោះទេ»។

គួរឱ្យដឹងថា អ្នកចរចាអ៊ីរ៉ង់ និងអាមេរិក បានបើកកិច្ចពិភាក្សាចុងក្រោយបំផុតនៅទីក្រុងហ្សឺណែវ កាលពីថ្ងៃព្រហស្បតិ៍សប្តាហ៍មុន ជាជំនួបដែលអូម៉ង់និយាយថា សម្រេចបាននូវវឌ្ឍនភាព ប៉ុន្តែស្រាប់តែពីរថ្ងៃក្រោយមកគឺនៅថ្ងៃសៅរ៍សប្ដាហ៍មុន សហរដ្ឋអាមេរិក និងអ៊ីស្រាអែល បានបើកការវាយប្រហារតាមអាកាសលើអ៊ីរ៉ង់ ដោយបានសម្លាប់មេដឹកនាំកំពូល លោក Ali Khamenei និងមន្ត្រីជាន់ខ្ពស់អ៊ីរ៉ង់ផ្សេងទៀត និងបង្កឱ្យមានវិបត្តិក្នុងតំបន់៕