​បាល់ទាត់៖ ក្លិប​បាល់ទាត់​បិសាច​ក្រហម Manchester United បានធ្វើ​ទំនាក់ទំនង​ទៅកាន់​អ្នកចាត់ការ Ajax Amsterdam បច្ចុប្បន្ន​លោក Erik Ten Hag ក្នុងការ​មកកាន់​តំណែង​នៅ Old Trafford​។ ​លោក Ralf Rangnick កំពុង​ដឹកនាំ Manchester United បណ្តោះអាសន្ន​តាំងពី​បណ្តេញចេញ​លោក Ole Gunnar Solskjaer កាលពី​ខែវិច្ឆិកា​។

​​លោក Erik Ten Hag នៅមាន​កិច្ចសន្យា​ដឹកនាំ Ajax ដល់​ដំណាច់ឆ្នាំ២០២៣ ដូចនឹង​អ្នកចាត់ការ PSG បច្ចុប្បន្ន​លោក Mauricio Pochettino ដែល​ស្ថិតក្នុង​បញ្ជី​បេក្ខភាព​ដែល​អាចមក​កាន់ការ​នៅ Old Trafford ផងដែរ​។ ​បុរស​វ័យ ៥២ឆ្នាំ​សញ្ជាតិ​ហូ​ឡង់​ដែល​ធ្លាប់​ដឹកនាំ​ក្រុម​បម្រុង Bayern Munich នោះបាន​មកកាន់​តំណែង​នៅ Ajax Amsterdam តាំងពី​ឆ្នាំ២០១៧ និង​បាន​ដឹកនាំ Ajax ស្ទើរតែ​ដល់​វគ្គ​ផ្តាច់ព្រ័ត្រ UEFA Champions League ទៅហើយ​តែ​ចាញ Spurs នៅ​នាទីចុងក្រោយ​នៃ​ជើង​ទី២ វគ្គ​ពាក់កណ្តាល​ផ្តាច់ព្រ័ត្រ​។

​​លោក​ក៏បាន​ដឹកនាំ Ajax ឈ្នះ​ពាន​លី​គ​កំពូល​ហូ​ឡង់​នៅ​ឆ្នាំ២០១៩ និង ២០២១ ខណៈ​បច្ចុប្បន្ន​កំពុង​នាំមុខគេ​ផងដែរ​ពីលើ​ក្រុម​លេខ២ PSV Eindhoven​។ ​មិន​ថា​អ្នកណា​មក​ដឹកនាំ Manchester United នៅ​រដូវ​កាល​ក្រោយ​ទេកីឡាករ​សំខាន់ៗ​ដូចជា Paul Pogba, Jesse Lingard, Edinson Cavani និង Juan Mata សុទ្ធតែ​ផុត​កិច្ចសន្យា​នៅ​ដំណាច់​រដូវ​កាល​នេះ​៕

​អត្ថបទ​៖​នាង សុភា​វុ​ធ