មន្ត្រីលំដាប់លេខពីររបស់មូលនិធិរូបិយវត្ថុអន្តរជាតិ IMF កាលពីថ្ងៃអង្គារ (៣ មីនា) បានលើកពីផលជះអវិជ្ជមានជាច្រើនដែលអាចកើតមានលើសេដ្ឋកិច្ចពិភពលោក ដោយសារតែជម្លោះដ៏តានតឹងនៅមជ្ឈិមបូព៌ា ប៉ុន្តែសង្កត់ធ្ងន់ថា ផលប៉ះពាល់នៃសង្គ្រាមទៅលើសេដ្ឋកិច្ចសកល ក៏នឹងអាស្រ័យលើរយៈពេល និងការខូចខាតដល់ហេដ្ឋារចនាសម្ព័ន្ធ និងឧស្សាហកម្មនៅក្នុងតំបន់ ជាពិសេសទីលើថា តើការកើនឡើងនៃតម្លៃថាមពលមានរយៈពេលខ្លី ឬក៏ជាប់លាប់។

លោក Dan Katz អនុប្រធានគ្រប់គ្រងទីមួយរបស់ IMF បានប្រាប់សន្និសីទអនាគតហិរញ្ញវត្ថុនៅទីក្រុងវ៉ាស៊ីនតោនថា ប្រសិនបើមានភាពមិនប្រាកដប្រជាយូរអង្វែងពីជម្លោះ និងផលប៉ះពាល់យូរអង្វែងលើតម្លៃថាមពល ដោយលោករំពឹងថា «ធនាគារកណ្តាលនានានឹងប្រុងប្រយ័ត្ន ហើយឆ្លើយតបទៅនឹងស្ថានភាពដែលកើតឡើងជាក់ស្តែង»។

លោក Katz បាននិយាយថា ជម្លោះនេះអាចមានផលប៉ះពាល់យ៉ាងខ្លាំងដល់សេដ្ឋកិច្ចពិភពលោកលើគ្រប់វិស័យ ទាំងអតិផរណា កំណើន និងអ្វីៗជាច្រើនផ្សេងទៀត ប៉ុន្តែក៏មិនទាន់អាចសន្និដ្ឋានឱ្យច្បាស់លាស់បានភ្លាមៗដែរ។

គួរឱ្យដឹងថា មុនពេលមានការវាយប្រហារតាមអាកាសរបស់អាមេរិក និងអ៊ីស្រាអែលលើអ៊ីរ៉ង់ និងការវាយប្រហារសងសឹកនៅទូទាំងតំបន់ មូលនិធិរូបិយវត្ថុអន្តរជាតិ (IMF) បានព្យាករពីកំណើនផលិតផលក្នុងស្រុកសរុប (GDP) សកលលោក មានភាពរឹងមាំចំនួន ៣,៣% ក្នុងឆ្នាំ២០២៦នេះ៕