តម្លៃប្រេង និងឧស្ម័នសកលបានកើនឡើងកាលពីថ្ងៃអង្គារ៣មីនាសប្ដាហ៍នេះ ខណៈសង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់បានបញ្ឈប់ការនាំចេញថាមពលពីមជ្ឈិមបូព៌ា ដោយទីក្រុងតេអេរ៉ង់បានវាយប្រហារកប៉ាល់ និងរោងចក្រថាមពល បិទការធ្វើនាវាចរណ៍នៅឈូងសមុទ្រ និងបង្ខំឱ្យបញ្ឈប់ការផលិត ចាប់ពីប្រទេសកាតា ដល់អ៊ីរ៉ាក់។

តម្លៃគោលប្រេងឆៅប្រភេទ Brent របស់អាមេរិក បានកើនឡើង ៣,៦៦ដុល្លារអាមេរិក ឬកើនឡើង ៤,៧ភាគរយ នៅត្រឹមតម្លៃ៨១,៤០ដុល្លារអាមេរិកក្នុងមួយបារ៉ែល ដែលជាការឡើងថ្លៃខ្ពស់បំផុតចាប់តាំងពីខែមករា ឆ្នាំ២០២៥ មក។

តម្លៃឧស្ម័នអឺរ៉ុបបានកើនឡើងរហូតដល់ ៤០ ភាគរយកាលពីថ្ងៃចន្ទដើមសប្ដាហ៍នេះ។ តម្លៃស្ករស ជីដាំដំណាំ និងសណ្តែកសៀងក៏បានកើនឡើងផងដែរ។

ជម្លោះនេះប្រឈមនឹងការកើនឡើងនៃអតិផរណា ដែលអាចរារាំងការងើបឡើងវិញនៃសេដ្ឋកិច្ចនៅអឺរ៉ុប និងអាស៊ី ប្រសិនបើសង្គ្រាមត្រូវបានអូសបន្លាយនៅក្នុងតំបន់ដែលមានចំនួនតិចជាងមួយភាគបីនៃផលិតកម្មប្រេងសកល និងស្ទើរតែមួយភាគប្រាំនៃឧស្ម័នធម្មជាតិ។

ការកើនឡើងនៃតម្លៃទាំងអស់នេះ ក៏អាចបង្កការគំរាមកំហែងផ្នែកនយោបាយដល់ប្រធានាធិបតីអាមេរិក Donald Trump និងគណបក្សសាធារណរដ្ឋរបស់លោកក្នុងការបោះឆ្នោតពាក់កណ្តាលអាណត្តិនៅខែវិច្ឆិកា២០២៦ខាងមុខនេះផងដែរ៕