ប្រធានាធិបតីអាមេរិក លោក Donald Trump បាននិយាយថា ការដោះស្រាយសង្គ្រាមរបស់រុស្ស៊ីប្រឆាំងនឹងអ៊ុយក្រែន គឺជាអាទិភាពមួយក្នុងចំណោមអាទិភាពសំខាន់បំផុតជាច្រើនរបស់លោក ដោយបញ្ជាក់ជាថ្មីលើការអះអាងរបស់លោកអំពី "ការស្អប់ខ្ពើមគ្នាខ្លាំង" រវាងលោក Volodymyr Zelenskyy និងមេដឹកនាំរុស្ស៊ី លោក Vladimir Putin។  

អ្នកឆ្លើយឆ្លងព័ត៌មាន Ukrinform របស់អ៊ុយក្រែន បានរាយការណ៍ថា លោកបានថ្លែងបែបនេះទៅកាន់ក្រុមអ្នកសារព័ត៌មានកាលពីថ្ងៃអង្គារ៣មីនាសប្ដាហ៍នេះ នៅឯសេតវិមាន ក្នុងអំឡុងជំនួបជាមួយអធិការបតីអាល្លឺម៉ង់ លោក Friedrich Merz។

លោក Trump ថាសង្គ្រាមរុស្ស៊ី-អ៊ុយក្រែន ស្ថិតក្នុងបញ្ជីអាទិភាពសំខាន់បំផុតរបស់រូបលោក ។ លោកបាននិយាយម្តងទៀតអំពីការអះអាងរបស់លោកថា លោកបានដោះស្រាយសង្គ្រាមចំនួនប្រាំបី ហើយបាននិយាយថា ការបញ្ឈប់សង្គ្រាមរបស់រុស្ស៊ី គឺជាអ្វីមួយដែលលោកជឿថា នឹងក្លាយជាកិច្ចការងាយស្រួលដែរ។

លោកប្រធានាធិបតីZelenskyy បានលើកឡើងថា សង្គ្រាមអូសបន្លាយ នៅតំបន់មជ្ឈិមបូព៌ា អាចកាត់បន្ថយលទ្ធភាពទទួលបានប្រព័ន្ធការពារដែនអាកាស សម្រាប់អ៊ុយក្រែន ដោយទទួលស្គាល់ពីផលប៉ះពាល់ដែលអាចកើតមានពីយុទ្ធនាការទម្លាក់គ្រាប់បែកដឹកនាំដោយសហរដ្ឋអាមេរិក នៅអ៊ីរ៉ង់។

លោកបន្ថែមថា ការដោះស្រាយសង្គ្រាមរុស្ស៊ី-អ៊ុយក្រែន គឺជាអាទិភាពចម្បងរបស់លោក មិនមែនដោយសារតែ វាប៉ះពាល់ដល់សហរដ្ឋអាមេរិកខ្លាំង នោះទេ ប៉ុន្តែដោយសារតែ លោកដឹងថា ក្នុងរយៈពេលបួនសប្តាហ៍កន្លងមកនេះ ទាហានចំនួន ៣២.០០០ នាក់បានស្លាប់។ចំនួនទាហានស្លាប់ជាមធ្យមមានចាប់ពី ២៥.០០០ ទៅ ៣០.០០០ នាក់ក្នុងមួយខែ នៅក្នុងសង្គ្រាមដ៏ផ្ដេសផ្ដាសមួយនេះហើយលោកចង់ឃើញជម្លោះនេះចប់ឲ្យបានឆាប់៕